Tekniku EDTL Sei Treinu Iha Indonesia

DILI-Iha fulan kotuk, Ministru Obras Publiku (MOP) Gastao de Sousa asina ona akordusaun ho Perusahaan Listrik Negara (PLN) Indonesia. Bazea ba akordusaun nee, MOP sei haruka tekniku EDTL ba tuir formasaun iha Indonezia.

Aban, tekniku hosi Diresaun Rekursu Humanus MOP sei ba Indonesia hodi haree no prepara fatin formasaun. Sira fila fali mai mak, MOP haruka tekniku EDTL hodi tuir formasaun. Programa nee tenke halao tamba kapasidade rekursu humanus tekniku EDRL minimu tebes.

“Bazea ba akordu neebe asina tiha ona, formasaun sei halao iha Bandung, Jawa Barat, Indonezia. Programa nee tenke halao tamba kapasidade rekursu humanus tekniku EDTL minimu tebes,” hatete MOP Gastao de Sousa ba jornalista hafoin partisipa diskusaun prepara avaliasaun konaba servisu governusaun, iha Centro Convencoes de Dili, Tersa (5/8).

Entretantu, Secretario Estado Electricidade Timor Leste (SEETL) Januario Pereira rekonese katak, akordusaun entre MOP no PLN nudar meus ida hodi kapasita funsionariu tekniku EDTL ba Indonesia. Kuandu kapasidade diak, sira halo servisu mos diak. Tan nee mak, tekniku EDTL sei haruka ba trenu iha Indonezia.

Membru Komisaun E-PN, Inacio Moreira husu ba governu tenke atensaun ba komunidade Atauro. Tuir nia hanoin, electricidade ba Atauro tenke uza solar panel. Fulan hirak liuba, SEETL Januario Pereira ba iha Parlamento Nasional esplika, governu hakarak dada  kabus sumarinu hosi Central Electricidade 30 MW subar hela iha  Komoro. Tansa SEETL nonok deit.
Jornal STL

Xanana Hakarak Halos Istoria, Mauk Moruk Dada An

DILI-Primeiru Ministru, Kay Rala Xanana Gusmão konvida Komandante Brigada Vermelha, Paulino Gama alias Mauk Mo­ruk, atu realiza debate publiku hodi halos istoria FRETILIN nian. Maibe Mauk Moruk lakohi atu mai partisipa iha dialogu nee ho razaun katak, Mauk Moruk haka­rak bispu nain tolu mak sai moderador ba debate ida nee, hanesan Bispu Dom Basilio do Nascimento, Bispu Dom Ricardo da Silva, no Bispu Norberto Ama­­ral.

“Hau atu fo mensajem ida ba povu tomak, hot-hotu kala akom­pania Mauk Moruk, mai too fali iha ita nia rai, hakarak hela fali ona iha Timor, hotu-hotu mos kala hatene no rona, nia mobiliza ema barak nebe agora iha Bau­cau neba, uza farda no buat oi-oin,” dehan Xanana liu husi nia mensajen ba povu Timor-Leste iha Aeroportu In­ter­nasional Ni­co­lau Lobato, Comoro, Dili,  Sa­badu (09/11/2013) bainhira fila husi Bali.

Nia hateten, ema barak rona katak, iha ema barak atu mai halo manifestasaun boot iha Dili iha 18/11/2013, maibe rona fali dehan, atu ba halo fali manifestasaun bo’ot iha Kararas 28/11/2013.

“Foin dadauk nee mos hau bolu Administradores Distritus no Sub-distritus, Komandantes PNTL ho F-FDTL, atu esklarese tanba hau rona no akompanha tuir, saida mak nia koalia, atu esklarese pontu balun kona-ba akontesementu sira nebe iha ailaran,” katak Xanana.

Nia esplika, iha resposta balun nebe mai ho surat kalen, no ema sira nebe hakerek surat kalen nee kobartes, hatudu an, i dalaruma iha ai laran karik sei hamutuk hela ou dalaruma bele joven oan ida mak hakerek surat kalen nee. Surat kalen nee hatudu deit katak, laiha korajen atu infrenta ba oin, tanba ida nee mak antes PM Xanana  atu ba Bali Democracy Forum ba dala 6.

“Ho ida nee mak hau hake­rek surat ba Prezidente da Republika, hodi konvida  Mauk Moruk atu halo debate publiku. Komunikasaun nebe ema balun halao ho Mauk Moruk, no nia mos ejiji atu bispu nain tolu mak sai moderador ba debate pub­liku ida nee, la hatene tanba sa. Ida karik nia iha liur neba, Mauk Moruk loro-loron deit nia ba misa, nee mak nia ejiji teb-tebes ida nee,” hateten Xanana.

Kona-ba involve­mentu bis­pu sira nian iha Mau­bisse I no Maubisse II, Vaticano bandu atu labele tama tan ba iha eventu sira hanesan nee. Tanba nee PM Xanana haruka Jeneral Lere atu koalia ho Mauk Moruk hodi esplika situasaun nee, tanba Jeneral Lere rasik maka ba koalia ho bispu nain tolu nee. Xanana promete atu forma ekipa ida nebe sai moderador ba debate ida nee.

“Tanba nia akuza hau buat barak ona, nee maka atu ba responde no rona took lia los. Kuandu hau sala hau mak nee nafatin, hau la sala hau mak nee nafatin,” Xanana haktuir.

Nudar Ministru Defeza no Seguransa,  Xanana preokupa­du tebe-tebes ho ema 800 nebe ohin loron Mauk Moruk kala iha rai liur nee manan osan barak hodi mai fo han ema sira nee. Xanana preokupadu tebe-tebes nia atu lori maluk sira nee atu halo manifestasaun oi-oin, tan­ba  krize 2006 hanorin tiha, krize 2008 hanorin tan. Needuni, nudar Ministru Defeza no Se­guransa hakarak evita asoens fortes, nee maka nia dehan, diak liu dialogu, liu husi publiku.

PM Xanana mos husu ba Prezidente Republika atu hasai konvite ba membru governu, Parlamentu Nasional, insti­tuisaun hotu-hotu, joventude ho intelektuais sira seluk, atu mai partisipa hodi haree katak, istoria nee lao oin nusa.

“Ohin hau too hau simu surat ida hanesan nee, sira haruka surat oin rua maibe ida fali hau sei estuda. Komu Mauk Moruk lakohi dialogu, hau sei ba hodi hatan ba perguntas sira nebe husi Parlamentu Nasional no sosiadade sivil hakarak husu mai hau, saida mak akontese atu hau esplika, tanba Mauk Moruk lakohi mai atu dehan katak, saida mak sala iha ailaran,” dehan Xanana.

Tanba nee eis lider rezis­tensia nee husu ba povu tomak atu tuur hakmatek iha uma hodi akompaña saida mak nia atu esplika iha Centru Convensaun Dili (CCD), nunee publiku bele hatene istoria nebe los.

Surat kona-ba atu hasoru malu iha loron 11 Novembru  nebe Konsellu Revolusaun haruka mai Primeiru Ministru mak ne’e, ami husu ba Sr. Xana­na atu bele kontempla no kum­pri aletra ami konselu revu­lusaun nia ejijensia, ne’ebe reprezenta povu ki’ik no kiak Maubere no nia interese iha prosesu ne’ebe hala’o dadauk ne’e nia laran, mak ami foin atende dialogu no debate publiku ho ami nia eis kom­pañeiru no eis camaradas Sr. Xanana. Kazu kontrariu, ami mantein ami nia pozisaun ho moral a’as, no konviksaun politika ne’ebe tuir prinsipiu no regras ne’ebe hori uluk ami komunga, no lori ba funu hodi liberta rai doben ida ne’e, hein atu buka hodi liberta tan povu ki’ik no kiak Maubere iha momentu crusial ida ne’e. Aluta kontinua, Konselu Revo­lusaun  Povu Maubere iha rai doben Timor Lorosa’e nia laran. Timor Leste 8/11/2013.

Xanana sei ba CCD atu koalia kona-ba ninia parte, lolos ne’e atu koalia kona-ba parte rua ne’e, hodi hatene katak, saida mak nia (Xanana) halo ba nia no saida mak Mauk Moruk halo ba Xanana, maibe Mauk Moruk lakohi mai. Mauk Moruk ejiji fali dehan katak, governu tenki responde buat sira ne’e hotu mak foin nia (Mauk Moruk) halo dialogu.

Tanba ne’e mak Xanana dehan, nia sei konsulta ho Pre­zidente da Republika, Parla­mentu Nasional, hodi fahe ezi­zensia husi konselu revolusaun ne’e, hodi hateten ba sira katak, nia (Xanana) sei ba hatan kona-ba ezizensia konselu revolu­saun nian ne’e. Konselu revu­lusaun dehan katak, sira sei la atende dialogu ho debate publiku, maibe laiha problema, tanba debate publiku ne’e entre Mauk Moruk ho Xanana.

“Mauk Moruk konta nia istoria, hau konta saida mak akontese, hodi povu tomak bele hatene, saida mak akontese iha ailaran ne’eba, durante gerilia, maibe komu nia dehan lakohi, agora hau husu bo’ot no hau hein no fiar teb-tebes katak, Prezidente sei aseita, tanba po­vu tomak tenki hatene katak, saida mak konselu revolusaun husu mai governu,” salienta Xanana.

Xanana afirma, nia mos rona ona katak, grupu ida ne’e mos hakarak atu bubarkan parlamentu, no governu no elisaun. Mauk Moruk iha kedas 1986 ka 1987, ba hela kedas ona iha Olanda ne’ebe rai demo­kratiku teb-tebes ida, nia hatene kedas, oinsa mak konstituisaun sira ne’e la’o.

“Hau husu ba populasaun hot-hotu atu hakmatek, no hau hau husu ba veteranus sira ne’ebe hau rona katak, balu hakarak halo fali protesta kontra sira, hakmatek, laiha veteranu atu hamriik koalia, veteranus sira senti katak lia los iha ne’ebe karik, ba iha CCD, Segunda lokraik,” husu Xanana.

Xanana mos husu ba ema 800 ne’ebe agora dadauk Mauk Moruk fo han hela katak, sorti Mauk Moruk mai mak fo han ema.

“Karik osan barak, hau sei haruka tan kiak barak teb-tebes iha Timor ne’e, ba konsellu re­vo­lusaun fo han. Sei iha nafatin kbi’it, fo hatene deit mai hau para hau bele hasai lista husi Timor tomak hodi konsellu revo­lusaun fo han tiha ba,” hatutan Xanana.

Tanba ne’e iha Segunda lokraik, sei hala’o duni, atu temi debate mos bele temi, nomos temi dialogou mos bele dehan dialogu. CPD-RDTL mos barak iha ne’eba, ne’ebe temi revolusaun.

“Hau hanoin fali imi, hau hanoin imi tanba komu imi la hatene no la akompaña, ami riku tiha ona, ami moris diak tiha ona ne’e mak ami iha televizaun, imi laiha ne’e mak imi la hatene,” dehan Xanana.

Tanba ne’e Xanana esplika, dalaruma temi revolusaun ne’e, ema la hatene, revolusaun ne’e saida. Joven intelektuais revolu­sionarius barak mos iha ne’eba.

Xanana haklaken, nia mos estuda Marksismu, no nia  mos halo parte iha Comite Central Fretilin husi 1975, tanba nee see mak iha CCF 1974 mak bele koalia Fretilin ho Xanana kona-ba revo­lusaun no Fretilin.

Ho ida ne’e, Xanana husu ba povu tomak atu tu’ur hakmatek, labele preokupa ho ida ne’e. Xanana apela ba sira hotu ne’ebe dadauk ne’e hamutuk hela ho Mauk Moruk hodi Mauk Moruk fo han sira katak, sira sorti boot, tanba sei iha aman ida ne’ebe mai hodi fo han netik sira.

“Maibe labele book an no labele provoka, hau Ministru de Defeza no Seguransa, situasaun defisil mos hau mak ne’e. Hotu-hotu labele monu iha kantigas sira ne’ebe dehan katak, kilat sei mai husi Australia, hau la fiar. Lalika monu ba liafuan sira ne’ebe dehan katak, kilat sei mai husi NATO, hau kontra hela buat ne’e, mais hau la fiar,” katak Xanana.

Xanana rasik kritika bebeik NATO nia intervesanu sira iha nasaun seluk, hanesan Tunisia, Libya, Egypto, Syria, Iraq no Afghanistan, tanba ne’e Xanana la fiar katak, NATO atu mai to’o iha Timor-Leste.

Iha informasaun mos dehan katak, container rua atu mai, maibe labele periksa. ISF nia kondutor sira deit mos sei halo passa revista ba sira.

“Orden ba veteranus sira atu tu’ur hakamatek labele book an, no ba 800 ne’ebe agora halibur malu hela iha Laga no Baucau no iha ne’ebe tan, hau husu ba imi, tu’ur hakmatek ba, imi estraga ema ida nia sasan no ema ida nia isin lolon, hau kaer imi. Imi tu’ur hakmatek imi iha direitu atu koalia no hakerek surat hanesan ne’e mai hau,” orienta Xanana.

Nia haree katak, intelektuais joven balu matenek teb-tebes, tanba sira ba hotu iha UNTL hodi halo palestra bo’ot ida, ida ne’e matenek teb-tebes. Sira halo tiha ida ne’e, la kleur husi joven sira UNTL dehan katak, sira sei halo revolusaun iha ne’eba, maibe ida ne’e kapaas.

“Hau la hatene sira komprende revolusaun ne’e saida, tanba hau kompriende, Marksista, Leninista no Mauista, salah satu uluk mak hau. Maoista hau aprende iha CCF, Fretilin ida uluk, ne’ebe hau respeita teb-tebes nafatin deit, tanba sira mak hanorin hau, atu halo funu,” relembra Xanana.

Tuir Xanana, ohin loron joven sira iha UNTL hateten dehan, sira grupu revolusaun, ida ne’e ka­pa­as, tasi sei sai boot teb-tebes, labarik sira ne’e hotu. Maibe atu dehan direitu no liberdade ne’e laos liberdade, maibe kontra ona revolusaun. Tanba konseitu sira ne’e hotu mak sei diskuti uitoan iha CCD.

“Feto balun bonita teb-tebes, hau la hatene, uluk kala hau sei ki’ik be hau la hare iha funu, hau la hare iha ailaran, mosu ona hakarak revolusaun, ida nee nia direitu no nia liberdade,” dehan Xanana.

Xanana mos informa ba ema 800 ne’ebe mak konsentra iha Baucau katak, se mak hatais farda lei iha, tanba farda ne’e so forsa deit mak bele hatais, diak liu intrega deit farda ne’eba. “Tenki kaer metin nafatin lia fuan ida mosu iha 2008 katak, adeus konflitu bemvindu dezenvol­vimentu,” Xanana fo hanoin.

Forum Demokrasia Bali Nasaun Boot Labele Ma­ni­pula Nasaun Kiik

Primeru Ministru (PM) Xa­nana Gusmão, partisipa iha Forum Demokrasia Bali ba dala 6. Iha momentu ida nee, PM Xanana husu ba nasaun boot atu labele manepula nasaun kiik, nebe iha mos demokrasia.

“Forum ida nee importante tebes, oinsa bele haburas demo­krasia iha mundu, hau husu mai ita hotu nebe iha nee, moris iha ambiente nebe demokrasia nia laran, paz no estabilidade. Husu mos ba nasaun boot sira labele halo manipulasaun ba nasaun kiik sira nebe iha demokrasia,” ha­te­ten  PM Xanana  iha Forum De­mokrasia Bali nee, foin lalais nee.

Tuir Xanana,  demokrasia iha nasaun ida iha mos nia dezafiu. Timor-Leste nudar nasaun kiik, nasaun boot sira mos tau in elijensia ba nasaun kiik, maibe ba Timor-Leste, demokrasia nee sai pilar ida nebe importante ba povu hodi lao ba oin.

Iha nia intervensaun nee mos koalia kona-ba situasaun iha nasaun Guinea-Bissau, nebe laiha paz no estabilidade no laiha ninia governasaun too ohin loron.

Iha Forum Demokrasia Bali nee, PM Xanana husu ba nasaun sira iha mundu atu fo nia apoiu no tulun ba Guinea-Bisau para rezolve problema nebe sira ha­soru durante nee, liu husi elei­saun nebe atu halao iha Guinea-Bissau.

Forum nebe halao Nusa Dua Bali ne’e, Xanana akompanha husi Ministru Negosiu Estran­jeirus no Kooperasaun, Jose Luis Guterres.

 Forum nee loke direitamente husi Prezidente Republika Indonesia, Susilo Bambang Yudho­yono akompanha husi Primeiru Ministru, Kay Rala Xanana Gusmão no Liurai Brunei-Darussalam, Sultan Hassanal Mu’izzaddin Waddaulah.

Forum demokrasia nee halao durante loron rua, hahu husi loron 07 – 08 Novembru 2013 no  hetan partisipasaun masimu husi nasaun barak iha mundu.
Jornal STL 

Xanana ho emosaun wainhira destaka PR indonéziu hanesan “belun di’ak” Timor-Leste nian

Primeiru-ministru Timor-Leste, Xanana Gusmão, ho emosaun, ohin iha Bali, Indonézia, wainhira destaka Prezidente sesante indonéziu, Susilo Bambang Yudhoyono, hanesan "belun di’ak" Timor-Leste nian.

"Ami iha ita bo’ot hanesan belun di’ak povu Timor-Leste nian", agradese xefe governu timor-oan, ne’ebé, dala barak, interompe diskursu, la ho matan ben.

Primeiru-ministru ko’alia wainhira simu kondekoras ho Medalla de Honra Indonézia nian, ba distinsaun importante liu governu indonéziu nian ba sidadaun estranjeiru sira, iha rohan husi Fórum Demokrasia Bali nian ba VII , ne’ebé hala’o entre ohin no aban iha illa indonézia.

Xanana Gusmão hanoin hikas ho emosaun inísiu tinan 2002, wainhira simu telefonema husi Susilo Bambang Yudhoyono, ida ne’ebé hafoin iha tinan rua mai sai nudar Prezidente Indonézia konvense nia hodi asumi lideransa ba destinu joven nasaun Sudeste Aziátiku nian.

"Ami pesija ita, pelumenus, ba mandatu tinan lima, tanba ami fiar katak ho ita, sai prezidente Timor-Leste, ita bele servisu hodi hari’i relasaun foun entre povu ho Estadu rua ne’e", tenik antigu jenerál, ko’alia hodi militár no governu indonéziu nia naran.

Hanoin hikas " jornada iha tinan 40, doloroza iha inísiu no difísil iha dékada resin ikus ne’e", antigu líder raunezisténsia ba okupasaun indonézia refere katak "iha mós tinan barak ba aprendizajen" iha sentidu "respeita" no "kompreende ema seluk" no kompreende funsionamentu relasaun entre nasaun sira.

Eis prezidente timor-oan ne’e hatutan mós katak enkontru barak iha ne’ebé " irmandade rua ne’e" harahun rijidés konvensionál relasaun entre Estadu no destaka respeitu no amizade entre povu rua ne’e.

Iha serimónia ho agradesimentu mútuo, Susilo Bambang Yudhoyono reforsa katak, durante lideransa Xanana Gusmão nian, " Indonézia ho Timor-Leste la’os sai viziñu di’ak deit, maibé mós, importante liu, sai belun di’ak".

"Ohin, faktu, loron espesiál no signifikativu", marka ema ne’ebé lidera destinu Indonézia nian tinan sanulu ikus ne’e no hakotu mandatu iha loron 20 Outubru.

Susilo Bambang Yudhoyono, koñesidu ho SBY, refere katak Xanana Gusmão "maka belun  lós Indonézia nian" no Medalla de Honra reprezenta "rekoñesimentu" ba kna’ar líder timor-oan nian iha relasaun entre nasaun rua iha tinan ikus ne’e.

Xefe Estadu indonéziu lembra katak país viziñu rua ne’e "asina, pelumenus, akordu 49 iha kampu oi-oin" no kooperasaun komersiál bilaterál aumenta nafatin iha kada tinan pursentu 12,7 iha tinan lima ikus ne’e.

"Relasaun entre Indonézia ho Timor-Leste dadaun ne’e karakteriza hosi konfiansa, kompreensaun no partilla valór demokrasia, igualdade no prosperidade mútua", nia hakotu.

Iha rohan husi enkontru ne’e, iha kumprimentu no hakuak entre delegasaun país rua ne’e nian, inklui militár sira, no matan ben Xanana Gusmão nian fahe mós ba elementu komitiva timor-oan barak.
Sapo TL 

Prezidente halo alerta kona-ba falta planeamentu no ordenamentu iha Dili

Prezidente Taur Matan Ruak ohin bolu atensaun kona-ba falta planeamentu no ordenamentu ba kresimentu sidade Dili nian, ne’ebé halo kapitál sai hanesan sidade “desordenada” no laiha infraestrutura sufisiente hodi hatan ba saida maka populasaun sira presija.

Xefe Estadu ko’alia lia hirak ne’e durante serimónia enseramentu hosi semináriu kona-ba “Signifikadu Dili sidade kapitál hanesan símbolu hosi independénsia no dezenvolvimentu nasionál”, hodi komemora aniversáriu hosi inísiu konstrusaun sidade ba dala atus rua, haat nulu resin-lima (245º).

“Kresimentu ne’ebé iha la hetan akompañamentu hosi planeamentu ne’ebé presija, nem kontrusaun hosi infraestrutura ida ne’ebé sufisiente hodi hatan ba populasaun ne’ebé barak ka aumenta”, dehan prezidente no hatutan tan ema ne’ebé hela iha Dili pursentu 20 hosi abitante besik millaun ida.

Tuir Taur Matan Ruak, populasaun ne’ebé barak fó impaktu ba meiu ambiente, desflorestasaun, liu-liu ba foho-kiik hirak ne’ebé hadula Dili nomós poluisaun ne’ebé fó impaktu ladi’ak ar, bee no rai sidade nian.

"Laiha planeamentu maka konstrusaun mós la’o la lós no ida ne’e maka prejudika funsionamentu iha sidade laran nomós prejudika morias hosi ema hirak ne’ebé hela iha sidade.

Abitante iha Dili laran barak maka hela iha uma at. Ladun iha planeamentu no ordenamentu maka halo Dili sai hanesan sidade desordenada ", hatutan xefe Estadu.

Taur Matan Ruak bolu mós atensaun katak kresimentu iha kapitál la’o lalais liu tanba ne’e maka kria kondisaun vida ne’ebé ladi’ak no bele hamosu problema foun ".

Iha diskursu, prezidente husu ba ema hirak ne’ebé hela iha Dili, atu servisu hodi nune’e bele “evita ka minimiza situasaun urbanizasaun deskontrolada”.

"Ita-ninia dever atu servisu, hamutuk hodi garante katak Dili sei sai hanesan faról ba nasaun- no hanesan mós ezemplu ida hodi hatudu ba mundu katak timor-oan mós iha kbi’it atu halo", konklui xefe Estadu.

Iha aniversáriu hosi sidade Dili ba dala atu rua haat nulu resin-lima (245º) , harii mós Associação dos Filhos de Díli ho objetivu atu aumenta intervensaun populasaun nian relasiona ho kestaun sosiopolítika no ekonómika.

Semináriu ne’e organiza hosi Centro Quesadhip Ruak no hala’o ho obejtivu atu promove partisipasaun sidadaun timor-oan nian ba iha dezenvolvimentu nasionál. 
Sapo Tl

Fundasaun Alola simu kadeira roda hitu hosi organizasaun japonés

Fundasaun Alola liu hosi Moisés da Silva, horisehik simu ona kadeira roda hitu hosi organizasaun japonés tuir kompromisu ne’ebé sira halo hodi ajuda ema difisiente sira, tuir komunikadu hosi sira-ninia pájina ofisiál.

Ida ne’e hanesan terseira faze ba instituisaun refere simu kadeira roda. Durante fulan tolu sira simu ona kadeira roda hamutuk 13.

Toshihide Nakayama nu’udar reprezentante hosi Organizasaun Japaun ne’ebé fó kadeira roda mai Timor-Leste dehan katak ajuda ne’e fó hosi grupu difisiénsia iha Japaun ba povu Timor-Leste hirak ne’ebé iha limitasaun ba parte fízika, ka laiha ain.

Ho ajuda ne’e bele fó ona dalan ba ema difisiénsia sira hodi hala’o netik atividade balun iha sira-ninia moris, dehan Toshihide.

Fundasaun Alola agradese tebes ba konfiansa ne’ebé belun japonés sira fó no sira sei fahe kadeira roda ne’ebé sira simu liu hosi Programa Saúde Materna no Labarik nian ba ema hirak ne’ebé presija. 
Sapo TL 

Xanana Gusmão iha Indonézia hodi partisipa aniversáriu Forsa Defeza no Fórum Demokrasia

Primeiru-ministru Xanana Gusmão, ohin hala’o viajen ba Indonézia hodi partisipa iha aniversáriu Forsa Defeza indonézia nian no iha Fórum  Demokrasia Bali.

Primeiru ministru Xanana Gusmão kumprimenta Prezidente Indonézia Susilo Bamgbang Yudhoyono durante vizita Prezidente indonéziu ba Timor Leste, 26 agostu 2014. Foto: António Amaral @Lusa

Tuir vise-ministru Negósiu Estranjeiru no Kooperasaun, Constâncio Pinto, katak akompaña Xanana Gusmão katak, primeiru-ministru ohin sei hala’o viajen ba Surabaya ne’ebé aban hodi ba partisipa iha serimónia aniversáriu Forsa Defeza Indonézia.

Husi Surabaya, Xanana Gusmão, ba Bali hodi partisipa, entre loron sesta no sábadu, iha sétima edisaun husi Fórum Demokrasia Bali, ne’ebé ho nia tema "Dezenvolvimentu Rejionál Arquitetura Demokrátika; dinámika dezenvolvimentu polítiku, progresu sosioekonómiku no partisipasaun públika iha prosesu demokrátiku".

Fórum Demokrasia Bali ne’ebé realize husi autoridade indonézia sira desde tinan 2008 no iha ninia objetivu hodi promove no insentiva kooperasaun rejionál no internasionál ba manutensaun paz no demokrasia liuhosi diálogu no fahe esperiénsia.

Iha enkontru Bali, Prezidente Indonézia, Susilo Bambang Yudhoyono, sei ba hala’o ninia partisipasaun ba dala ikus nian nu’udar xefe Estadu, funsaun ne’ebé sei remata iha loron 20 oin mai bainhira entrega ba Prezidénsia país Joko Widodo, ne’ebé manán eleisaun no antigu governadór Jakarta.

Alén vise-ministru Negósiu Estranjeiru akompaña primeiru-ministru, sekretáriu Estadu Defeza, Júlio Tomás Pinto, Xefe Estadu-Maiór Jenerál Forsa Defeza timoroan, jenerál Lere Anan Timur.

CPLP sei ajuda Guiné Equatorial hodi halo “integrasaun efetiva” ba portugés

Institutu Internasionál Lian Portugés nia (IILP) sei tau "atensaun espesiál tebes" hodi promove "integrasaun efetiva" ba portugés iha Guiné Equatorial, fó sai ohin diretora-ezekutiva foun ba organismu Komunidade País Lian Portugés (CPLP).

Guiné Equatorial adere ona ba CPLP iha Jullu tinan ne’e, durante simeira iha Díli, sai hanesan kondisaun ida ba adosaun portugés hanesan lian ofisiál, iha país ne’ebé maioritariamente ko’alia español no adota francês hanesan lian ofisiál.

" Guiné Equatorial sei hetan atensaun espesiál tebes. Ami iha protokolu metin tebes iha área ne’ebé ami tenki ajuda Guiné Equatorial, la’os deit iha nível ensinu ba lian, ba formasaun profesór sira nian, maibé mós iha perspetiva inkluzaun ba programa iha lian portugés iha kanál televizivu no radiofóniku sira no formasaun iha lian portugés ba ajente administrasaun públika", afirma ohin ba jornalista sira diretora-ezekutiva foun IILP nian, Marisa Mendonça.

Responsável ne’e alerta katak trata hanesan "protokolu bo’ot", ne’ebé la iha país ida bele hala’o mesak.

"Presiza dezeña estratéjia intervensaun ida iha Guiné Equatorial, ho forma atu esforsu sira ne’e tradus iha integrasaun efetiva -- no ha’u subliña, efetiva -- ba liang portugés iha Guiné Equatorial", defende diretora foun organismu CPLP nian ne’e, iha rohan hosi reuniaun komité konsertasaun permanente komunidade luzófona, durante aprezenta nia programa no simu pose ba kargu ne’e.

Hosi parte autoridade equato-guineenses sira nian, iha interese ba adosaun portugés, disponibiliza ona "ho nia vontade di’ak tomak no rekursu balun – ne’ebé sei la uitoan, lojikamente" no intensaun hodi kria sentru lian portugés iha país.

Maibé, Marisa Mendonça rekoñese katak nia prosesu sei naruk.

"La’os prosesu ne’ebé lalais. Lian ida ne’ebé tama ba kontestu iha ne’ebé lian sira seluk asumi tiha ona nia fatin ", nia konfirma, refere katak ida ne’e sai hanesan " dezafiu bo’ot" ne’ebé mak membru CPLP hotu tenki asumi .

Marisa Mendonça, hosi Mosambike, ohin simu pose hanesan diretora-ezekutiva IILP nian, durante reuniaun estraordinária komité konsertasaun permanente CPLP nian, iha nia sede, iha Lisboa. Troka brazileiru Gilvan Müller de Oliveira, ne’ebé asume kargu ne’e durante tinan haat.

Entidade Reguladora husi Komunikasaun Sosiál sei ajuda Timor-Leste hodi kria entidade omóloga

Entidade Reguladora Komunikasaun Sosiál husi Portugal ho sekretáriu Estadu Komunikasaun Sosiál timoroan, Nélio Isaac Sarmento, ohin asina Memorandu Entendimentu hodi ajuda Timor-Leste ba kria entidade omóloga ida.

Memorandu Entendimentu asina durante serimónia enserramentu husi ekontru III kona-ba Plataforma Entidade Reguladora Komunikasaun Sosiál nian husi País sira no Territóriu Lian Portugés nian.

Akordu "sei ajuda Governu Timor-Leste hodi hametin instituisaun foun husi Konsellu Superiór Imprensa ne’ebé sei kria. Ami mós serbisu hamutuk ho apoiu husi Estadu-membru CPLP seluk" (Komunidade País Lian Portugés), afirma sekretáriu Estadu timoroan.

"Kooperasaun eziste maka prátika laiha ne’e la funsiona. Buat ne’ebé ami foin asina tiha mak nu’udar dokumentu ida ne’ebé materializa intensaun ne’e", dehan prezidente Entidade Reguladora husi Komunikasaun Sosiál portugés, Carlos Magno.

Tuir Carlos Magno katak, kooperasaun ne’e sei halo liuhosi formasaun kuadru sira, fahe esperiénsia no komunikasaun permanente.

Enkontru ne’e hanesan objetivu ida hodi  reflete kona-ba modelu regulasaun nian husi komunikasaun sosiál eziste iha CPLP no hadi’a maneira kooperasaun bilaterál no multilaterál nian.

Iha sormutu ne’e partisipa husi reprezentante entidade regulador Angola, Guiné-Bisau, São Tomé e Príncipe, Portugal, Guiné Conacri, Mosambike no Timor-Leste.

Durante enkontru, Timor-Leste sai prezidénsia plataforma, nune’e mós ba reuniaun tuir mai sei hala’o iha tinan oin iha Portugal.
Sapo TL 

Timor-Leste labele husik atu estranjeiru sira domina iha país

Prezidente repúblika Taur Matan Ruak, hala’o diálogu ho komunidade sira husi Baucau, iha sábadu liuba, husu atu labele tur hare de’it ba atividade sira ne’ebé sidadaun estranjeiru hala’o daudaun iha país, maibé mós presiza hola inisiativa no hahú halo buat ruma ba nasaun.

Foto husi Prezidente Repúblika
Estranjeiru sira tama iha país halo ema barak mak preokupa, liu liu iha área negósiu no ida ne’e hamosu diskusaun entre komunidade sira.

Pascuela Belo husi suku Letemumu, sub-distritu Quelecai, distritu Baucau dehan katak oras ne’e daudaun povu timoroan mak sai vítima ba iha sira ninia rain rasik. ”Ohin povu rasik mak sai fali  vizitante ká bainaka ba ninia rain tanba estranjeiru sira mak domina iha país, mak hanesan indonéziu no xinés sira.

Nia mós husu ba prezidente atu hamutuk ho governu Timor-Leste hodi rezolve kestaun ne’ebé estranjeiru sira domina iha país.

Adelino Soares mós konkorda ho intervensaun husi Pascuela no nia hatuta tán katak Timor iha ema matenek, tanba ne’e, fó ezemplu katak sira kontinua utiliza estranjeiru sira konstrusaun bobot.

Iha preokupasaun komunidade sira nian, prezidente repúblika husu ba sira atu serbisu maka’as no atu halakon tiha hahalok baruk ten.

“Ha’u mós lakohi ha’u-nia povu sofre iha país maibé ha’u husu ba imi atu aprende no haka’as aan. Sei pior liu bainhira ita la halo buat ida, dala ruma ita serbisu só oras ida ká oras rua de’it. Ida ne’e lebele akontese tán’’dehan Taur Matan Ruak     
Sapo TL

Xanana Gusmão kritika funsionamentu organizasaun internasionál sira nian

Primeiru-ministru Timor-Leste, Xanana Gusmão, hatete ohin ba ajénsia Lusa, iha Nova Iorque, katak "komunidade internasionál la’o tuir dalan ne’ebé la los hodi rezolve problema sira mundu nian."

"Komunidade internasionál está la’o tuir dalan ne’ebé la los hodi rezolve problema sira mundu nian. Envesde rezolve eskluzaun ho desigualdade sosiál no ekonómika, wainhira mosu konflitu ki’ik oan ida, haruka kedas forsa militár", tenik primeiru-ministru timor-oan ne’e.

Respeita "direitu umanu no halo funu, respeita paz no halo funu no dala ruma respeita demokrasia, hanesan kazu Líbia, Ejitu no Irake nian", hatutan Xanana Gusmão.

Iha loron-sesta, timor-oan ne’e kritika, durante nia diskursu iha 69.ª Asembleia-jerál Nasaun Unida, funsionamentu ONU no pedidu ajenda dezenvolvimentu transformadora.

"Ita sempre defende katak dalan militár sira nian la rezolve problema. La fó rezultadu. Presiza hare kauza reál problema nian, se karik ita la adota lei medievál olho por olho dente por dente", hatete reprezentante ne’e.

Xanana Gusmão defende mós alterasaun radikál iha organizasaun instituisaun internasionál, liu-liu iha forma oinsa jere sira nia orsamentu.

Polítiku ne’e entende katak "presiza muda forma oinsa hala’o doasaun, tanba, hosi milaun ida, nem 30% to’o [ba ema]. 70% ba saláriu konsultór no jestór sira projetu nian, saláriu ne’ebé bo’ot tebes."

"Ita tenki muda buat hirak ne’e hotu, se la iha osan barak ne’ebé hanoin katak ba fatin balun hamenus kiak no ida ne’e la akontese, migalla ne’ebé simu la nato’on", nia hatete.

Primeiru-ministru kompreende, iha Timor-Leste no iha nasaun sira maka vizita, katak "ema sira ne’ebé tun ba lokál dala barak la iha esperiénsia ruma, pasa hosi organizasaun ida ba organizasaun seluk, liu semana haat husu lisensa no manan osan ne’ebé bo’ot."

"Buat hirak ne’e hotu halo halo organizasaun barak la funsiona ho di’ak. Intensaun di’ak tebes, programa sira mesak fantástiku. Hanorin ita sustentabilidade, transparénsia, buat barak, maibé atuasaun hosi organizasaun barak maka la koresponde ba ida ne’ebé hanorin", timor-oan ne’e hakotu.
Sapo TL 

Garuda hahú ligasaun aéreu entre Bali no Timor-Leste iha 25 Outubru

Kompañia aérea estatál indonézia Garuda hahú ligasaun iha loron 25 fulan-Outubru entre Bali, Indonézia, no Timor-Leste, liafuan sira ne’e fó sai horisehik hosi Air Timor, ne’ebé hanesan responsável ba fa’an billeti sira iha Díli, iha loron-sesta ne’e.

Tuir pájina iha Internet Air Timor nian, semo ne’e sei hala’o loron-loron no billete sira ligasaun nian sei hahú fa’an iha eskritóriu sira iha Díli.

Garuda sei hahú semo ba Timor-Leste hanesan rezultadu hosi asinatura Memorandu Entendimentu ida entre administradór hosi empreza Emirsyah Satar ho diretór Air Timor Abessy Bento iha fulan-Agostu durante vizita ofisiál ida hosi Prezidente Indonézia nian, Susilo Bambang Yudhoyono, iha Díli.

Agora daudaun kompañia sira ne’ebé maka semo ba Timor-Leste maka kompañia Sriwijaya hosi Indonézia ne’ebé halo ligasaun loron-loron ba Bali, Air North ne’ebé semo loron-loron ba Darwin, iha Austrália, no Silkair ne’ebé halo ligasaun ba Singapura semana ida dala tolu.
Sapo TL 

PM lamenta ho atuasaun hosi Austrália kona-ba kestaun fronteira marítima

Primeiru ministru Xanana Gusmão ohin kritika Austrália iha diskursu ne’ebé nia halo iha 69.ª Asembleia-jerál ONU bainhira husu kona-ba limitasaun fronteira maritime entre nasaun rua nomós atuasaun hosi multinasionál iha nasaun hirak ne’ebé ki’ak.

Maski lahaktuir diretamente naran hosi nasaun viziñu ne’e, maibé Xanana Gusmão alerta iha ninia diskursu atu “define lolos no ho seriedade kona-ba fronteira maritime entre nasaun ne’ebé hamriik iha direitu internasionál nia okos”.

“Iha 2002 bainhira ami ukun-aan ona, ami hasoru mundu globalizadu ne’ebé nakonu ho arogánsia no ambisaun ne’ebé maka’as, aproveita inexperiénsia no ignoránsia hosi ema ki’ak no kiik sira hodi komete hahalok bosok no ladi’ak ne’ebé sai nu’udar insultu ida ba valór universál”, hatutan Xanana Gusmão.

Primeiru ministru dehan tan katak “multinasionál bobot sira sempre hatene halo papel imprópriu no desleál, hala’o ho desonestidade no ladi’ak bainhira lida ho nasaun hirak ne’ebé ki’ak”.

“Timor-Leste hanesan nasaun joven, kiik no ki’ak, ne’ebé mós lakonsege hasees-aan hosi hahalok manipulasaun no bosok no hakarak kontinua fi’ar katak mekanismu internasionál hanesan Konvensaun hosi Nasoens Unidas kona-ba Direitu Tasi bele fó kontribuisaun ne’ebé iha lia-los entre nasaun no entendimentu entre povu hodi defende lia-los no direitu soberanu”, dehan Xanana Gusmão.

Timor-Leste akuza formalmente Austrália iha Tribunál Permanente Arbitrajen iha Haia tanba kazu espionajen bainhira nasaun rua halo negosiasaun kona-ba Akordu gás no mina iha Tasi Timór.

Ho arbitrajen internasionál, Timor-Leste hakarak atu anula tiha akordu ne’ebé iha, atu nune’e bele halo fali negosiasaun hodi bele kria limitasaun hosi fronteira maritime no hasai proveitu hothotu hosi ninia rekursu petrolífera.

Paralelamente, Estadu Timór mós hahú hala’o asaun judisiál oioin hasoru empreza petrolífera hothotu tanba deskunfia lakohi selu impostu ba petróleu. 
Sapo TL 

Governu ajuda ema 20 hodi loke Loja Povu

Ministériu Komérsiu, Indústria no Ambiente fó oan apoiu finanseira ba ema 20 hodi loke Loja Povu iha distritu 11, tuir nota ne’ebé governu haruka sai ba imprensa.

“Ami hala’o hela lansamentu ba Loja Povu iha área remota nomós iha distritu. Benefisiáriu sira ne’ebé hetan eskolla maka sai hanesan meiu ligasaun hosi Ministériu ba subdistritu, hodi hala’o knar iha merkadu lokál, atu nune’e bele lori sasan ba to’o subdistritu”, dehan ministru Komérsiu, Indústria no Ambiente, António da Conceição, no sita iha nota ba imprensa ne’ebé fó sai horisehik.

Ema ida sei simu dolár rihun lima (besik euros 3,9) hodi loke Loja Povu iha distritu Ainaro, Bobonaro, Baucau, Ermera, Manatuto, Manufahi, Lautém, Liquiçá, Oecússi, Covalima no Viqueque.

Konseitu kona-ba Loja Povu fó sai iha inísiu tinan ne’e no estabelesimentu hosi Loja refere atu populasaun hothotu bele hetan asesu ba produtu hosi nesesidade bázika.

Loja Povu sei harii iha subdistritu 65, ho apoiu hosi Uniaun Nasionál ba Empreza Kiik ne’eb’e asina ona memorandu entendimentu ho Governu iha fulan janeiru liu ba.

Loja Povu sei nu’udar parseiru governu nian iha iha programa intervensaun komersiál, hodi hatan ba situasaun emerjénsia, hanesan laiha foz ka produtu seluk ne’ebé sai nu'udar nesesidade bázika.

Produtu hosi nesesidade dahuluk ne’ebé sei faan iha Loja Povu maka hanesan, fos, masin-midar, mina hodi tein, temperu, modo-tahan, susu-been, manu-tolun no trigu. 
Sapo TL 

Empreza ne’ebé produs serveja hakarak loke fábrika iha Timor-Leste

Sekretária Estadu ba Apoiu no Promosaun Setór Privadu ohin fó sai iha komunikadu katak empreza internasionál rua ne’ebé produs serveza hakarak loke fábrika iha Timor-Leste.

Tuir komunikadu, Heineken sei mai investe dolár milloens 40 (besik euros milloens 31) iha Timór hodi harii fábrika halo serveza, bebida alkólika no bebida ne’ebé laalkólika.

“Empreza refere submete ona pedidu konsesaun kona-ba sertifikadu investidór ida no akordu espesiál ba investimentu ne’e sei asina ho governu Timor-Leste”, fó sai Sejretária estadu ba Apoiu no Promosaun Setór Privadu, hodi hatutan tan katak desizaun finál sei depende ba pareseres hosi Konsellu Ministru.

Investimentu ne’e sei halo hosi Heineken Singapura, empreza multinasionál Heineken ne’ebé loke ona sira-ninia empreza iha nasaun 70 no fó servisu ba funsionáriu besik rihun 85.

Empreza ne’ebé iha Timor-Leste rejista ho naran Heineken Timor,S.A, hakarak loke postu servisu 1.000.

Dinamarkeza Carlsberg hanesan marka hosi serveija seluk ne’ebé mós hakarak harii sira-ninia fábrika iha Timor-Leste, hafoin diretór rejionál ba sudeste aziátika, Henrik Juel Andersen halo vizita mai Timor-Leste.

Iha komunikadu ne’e mós fó sai katak kria daudaun prosedimentu atu nune’e “empreza bele kandidata ho estatutu investidór”.

“Ho situasaun polítika ne’ebé estável no kondisaun ekonómika ne’ebé di’ak iha rai-laran, alénde insentivu jenerozu ba investimentu no garante protesaun ba investidór sira, Timór hanesan destinu ka fatin investimentu ba empreza bobot sira”, dehan sekret’aria Estadu ba Apoiu no Promosaun Setór Privadu, Veneranda de Lemos.
Sapo TL

Estadu tenke kontrola operadór telekomunikasaun iha Timor-Leste

Parlamentu Nasionál liu hosi deputadu Paulino Monteiro Bankada PD (Partidu Demokrátiku) husu ba Ministériu Transporte no Telekomunikasaun atu kontrola operadór telekomunikasaun hirak ne’ebé ezisti iha Timor-Leste, fó sai jornál Suara Timor Lorosa’e.

Tuir ninia observasaun kompañia Telemor ho Telkomcel fahe kartaun sim’s livre ka la halo uluk rejista iha sira-ninia baze dadus. Ho prosedimentu refere maka bele kria obstákulu iha rai-laran, liu-liu fasil liu atu ema hatene informasaun/segredu nasaun nian. Tanba ne’e Ministériu kompetente tenke forma orgaun reguladór ida hodi kontrola kestaun refere.

“Karik la halo rejista ba kartaun sim’s molok fahe, maka bele hamosu problema. Ezemplu, iha loron hirak liu ba númeru 122 liga ba polísia no insulta polísia, ita lakonsege deteta ema ne’ebé uza númeru refere”, fó sai deputadu durante sesaun plenária iha Parlamentu Nasionál.

Iha parte seluk deputada Fernanda Lay, bankada CNRT hatutan tan katak importante tebes atu autoridade reguladór sira kria regulamentu ba kompañia telekomunikasaun hothotu iha rai-laran atu nune’e labele hamosu problema.

Iha fastin hanesan Sekretária ba Asuntu Parlamentár, Teresinha Maria Viegas dehan katak sei hato’o tema ne’e ba Ministériu kompetente hodi buka solusaun. 
Sapo TL   
Burger King Timor Leste

Timor-Leste iha CPLP nia oin ho garante ba kooperasaun ekonómika no emprezariál

Prezidénsia Timor-Leste Komunidade País Lían Portugés nian (CPLP) sai hanesan prioridade ba kooperasaun ekonómika no emprezariál, no aproveita faktu katak sai hanesan úniku país organizasaun iha Ázia, rejiaun ho forte dinamismu ekonómiku.

 

"Prioridade Timor nian maka dezenvolve parte ekonómika, promove dezenvolvimentu empresariál ho investimentu no kooperasaun ekonómika no emprezariál", hatete ba Lusa sekretáriu-ezekutivu CPLP nian, Murade Murargy.

Timor-Leste, ne’ebé asumi prezidénsia komunidade nian iha jullu no sei kaer mandatu tinan rua, "iha zona ida ne’ebé dinámika tebes iha termu ekonomia no hakarak aproveita hodi haluan CPLP iha termu ekonómiku no emprezariál ba zona ne’e", refere responsável ne’e.

Dadaun ne’e Prezidénsia CPLP nian " foka liu ba kriasaun ambiente negósiu propísiu atu nune’e emprezáriu sira bele dezenvolve ho livre sira nia negósiu", tenik Murade, no fó ezemplu projetu balun ne’ebé iha hela estudu: konstituisaun multinasionál ba esplorasaun bloku petróleo iha Timor ka kriasaun ba banku ida ka fundu investimentu ida.

"Ohin loron, ita hare’e katak iha ita nia espasu CPLP nian iha rekursu barak, liu-liu enerjétiku, maibé agrikultura mós. Nasaun afrikanu sira hanesan Angola ho Mosambike perfeitamente bele, liu hosi kooperasaun ne’ebé sistematizada liu, prodús hahan hodi fornese ba merkadu iha Médiu Oriente", nia fó ezemplu.

Ba ida ne’e, presiza "hadia kondisionalismu balun", liu-liu iha nível lei ba traballadór sira nian.

Durante prezidénsia timor-oan nian ne’e, CPLP sei mantén iha Díli reprezentante permanente ida.

"Timor do’ok tebes hosi ita, maibé presiza besik nafatin mai ita. Hanesan bai-bain ema dehan: do’ok hosi matan, maibé besik iha fuan", tenik Murargy.

"Reprezentante permanente sei hakbesik an liu tan mai ita. Sei fó vizibilidade bo’ot ba CPLP iha zona ne’e, sei servisu hodi hatudu ita nia ideai no ita nia imajen", nia hatutan.

Prinsipál dezafiu sira seluk prezidénsia timor-oan nian maka definisaun ba estratéjia foun CPLP nian, servisu ne’ebé desidi hodi konstitui, durante simeira iha Díli, grupu ba servisu.

"Ne’e mak desizaun bo’ot", haforsa liu tan responsável komunidade nian ne’e.
Los maka reforsu vertente ekonómika nian sei sai " liña bo’ot ba vizaun foun".

"Estrada prinsipál maka ita nia valor ho lían. Agora ita tenki kria ona subsídiu seluk ne’ebé bele fó liu tan forsa ba komponente polítiku-diplomátika ne’e, hanesan parte emprezariál, mobilidade, kriasaun Erasmus ba CPLP", nia afirma.

Iha semana oin, ministru Negósiu Estranjeiru hosi Estadu-membru nain sia CPLP nian sei hala’o sorumutu iha Nova Iorque, se’es hosi asembleia-jerál Nasaun Unida nian, iha ne’ebá sei sai hanesan reuniaun dahuluk iha ne’ebé Guiné Equatorial partisipa ona hanesan membru ne’ebé iha direitu tomak. Enkontru ne’e hala’o hodi diskuti asuntu oi-oin, maka hanesan apoiu ba Guiné-Bissau no balansu simeira Díli nian, ne’ebé realiza iha rohan hosi fulan Jullu.

Sapo TL
Burgerking Timor-Leste

Portugal no Indonézia iha “obrigasaun” hodi “salva Timor-Leste”, dehan investigadór

Portugal no Indonézia iha "obrigasaun morál" hodi "salva Timor-Leste karik hetan maldisaun husi rekursu natural sira", ne’ebé halo nasaun moris iha pobreza nia okos ne'ebé aumenta iha país, dehan ba Lusa investigadór indonéziu Kristio Wahyono.

Hauba, distritu Bobonaro. Foto: Epifânio Sarmento

"Ida ne’e sai hanesan obrigasaun morál ida” ba nasaun rua ne’e hodi “salva Timor-Leste husi ‘maldisaun rekursu naturál sira', tanba ekonomia timoroan nian ne’e sai hanesan nasaun ida ne’ebé iha mundu depende liu ba petroleum. Kazu kontráriu, nasaun eam barak liu husi país ne’e maka moris hela iha liña pobreza nia okos", alerta.

Kristio Wahyono hein katak tema ne’e atu bele diskuti ohin, iha vizita ba Portugal husi Prezidente Indonézia nian, Susilo Bambang Yudhoyono.

Nia mós sai nu’udar antigu reprezentante husi Indonézia iha Administrasaun Transitória husi Nasoens Unidas iha Timor Leste (UNTAET), entre 2000 no 2003, defende katak nasaun rua ne’e presiza apoiu governu timoroan iha Planu Estratéjiku Dezenvolvimentu 2011-2030 no investe iha país.


Maski la konkorda ho espesialista sira nia alerta kona-ba risku país nian ne’e sei hetan Estadu ida ne’ebé falladu, dosente Estudu Timor-Leste konsidera katak Indonézia iha "obrigasaun morál" hodi prevene buat ne’e atu la akontese, hafoin ukun tiha país refere iha tinan 1975 no iha ne’eba mak halo violasaun direitu umanu durante tinan 25.

"Governu tuir mai husi Indonézia nian labele komete tán erro, aproveita ho oportunidade ekonómika ká envolve iha esplorasaun petroleum iha Tasi Timor, só iha de’it konsentimentu Timor-Leste no Austrália", nia hatán.

Kathleen Rustici, diretora-adjunta husi departamentu Sudeste Aziátiku Sentru ba Estudu Estratéjiku no Internasionál sira (CSIS, ho sigla inglés), dehan katak Indonézia haree Timor-Leste hanesan "parseiru" ida, tanba partill illa ida ho país viziñu, hafoin, "dezenvolvimentu no estabilidade [timoroan sira nian] sai di’ak" ba nasaun rua ne’e.

Indonézia apoia hela Timor-Leste iha área oioin, hanesan dezenvolvimentu rejionál, peska no edukasaun, maski nune’e parte di’ak balun husi produtu ne’ebé disponível iha antiga kolónia portugeza ba merkadu indonéziu nian.

Ba Kristio Wahyono, Portugal no Indonézia tenke "insentiva no fó asisténsia tomak ne’ebé bele ba Timor-Leste" liuhosi Komunidade País Lian Portugés (CPLP) no husi Asosiasaun Nasoens Sudeste Aziátiku (ASEAN), respetivamente.

Timor-Leste mak nu’udar país úniku husi Sudeste Aziátiku ne’ebé la dauk admiti iha Asosiasaun Nasoens Sudeste Aziátiku (ASEAN) no rejiaun úniku mak halo parte ba CPLP.

Viajen ba Portugal, hanesan mós hala’o vizita ba Timor-Leste iha fulan-agostu, iha  intensaun Susilo Bambang Yudhoyono atu hakotu kapítulu okupasaun indonézia husi antiga kolónia portugéza, tuir deklarasaun sira husi ministru Negósiu Estranjeiru Indonézia, Marty Natalegawa, profere ba ajénsia Lusa iha fulan-agostu.

Tuir imprensa indonézia, antigu jenerál indonéziu Agum Gumelar semana kotuk dehan katak,  husi governu kria ekipa ida hodi buka fatin ne’ebé Nicolau Lobato mate ba, líder Rezisténsia Timoroan, ne’ebé ema oho durante kombate kontra militár indonézia sira iha 1978.

Iha interpretasaun Kristio Wahyono, maski autoridade timoroan sira sakrifika  hodi buka justisa iha prol pás nian, Susilo Bambang Yudhoyono hakarak atu evita katak "legadu violasaun direitu umanu" bele sai hanesan "pezu" ba ninia susesór, Joko Widodo, ne’ebé sei haksumik funsaun ba 20 outubru.

Iha eleisaun prezidensiál foin lalais ne’e, Partidu Demokrátiku, husi Susilo Bambang Yudhoyono, apoia kandidatu ne’ebé lakon, Prabowo Subianto, maka, tuir relatóriu balun, katak nia mak lidera unidade ne’ebé oho Nicolau Lobato no naran ida ne’e mós asosia ba violasaun direitu umanu sira seluk iha Indonézia.

Kathleen Rustici konsidera katak Prezidente indonéziu "dezempeñu mistu ida bainhira trata hodi aborda direitu umanu", maibé rekoñese katak Indonézia evoluí iha aspetu ne’e no destaka katak relasaun ho Timor-Leste "komesa la’o di’ak", durante tinan sanulu prezidénsia Susilo Bambang Yudhoyono.

Vizita ofisiál ikus liu husi xefe Estadu indonéziu ba Portugal hala’o iha 1960. Nasaun rua ne’e sira nia relasaun diplomátika kotu durante period okupasaun indonézia, ne’ebé ikus mai ho deklarasaun independénsia Timor-Leste iha tinan 2002.

Sapo TL ho Lusa

Austrália entrega kareta 10 ba Polísia Nasionál Timor-Leste

Polísia Nasionál Timor-Leste (PNTL) simu ona kareta 10 no motór tolu hosi governu Austrália bazeia ba programa apoiu dezenvolvimentu ba forsa seguransa refere, tuir informasaun ne’ebé fó sai ohin hosi embaixada Austrália nian iha Dili.

Foto: EPA/António Dasiparu

Kareta ho motór hirak ne’e entrega ona ba komandante jerál PNTL, Longuinhos Monteiro, hosi kordenadór programa australaiana nian, Graham Waite, ne’ebé garante katak Austrália sei kontinua apoia nafatin Timor-Leste iha área desenvolvimentu profisionál polísia nian.

"Kareta hirak ne’e hatudu ami-ninia kompromisu no ami sente orgullu bainhira kontinua fó nafatin apoiu ba PNTL ne’ebé hakarak dezenvolve-aan sai nu’udar organizasaun seguransa ida ne’ebé profisionál ", dehan Graham Waite.

Programa australiana apoiu ba dezenvolvimentu kapasidade PNTL nian jere hosi Polísia Federál Australiana no hahú aplika desde 2004.

Kareta ho motor ne’ebé Austrália entrega sei uza hodi fó treinu ba motorista PNTL nomós hodi halo patrullamentu seguransa iha distritu Dili.

SAPO TL ho Lusa

EUA entrega ekipamentu bee no saneamentu ba Timor-Leste

Ajénsia norte-amérika nian ne’ebé fó apoiu ba dezenvolvimentu (USAID) ohin fó sai iha komunikadu katak entrega ona materiál bee, saneamentu no ijiene nian ba Timor-Leste ho valór dolár rihun 250 (besik euros rihun 193).

Tuir komunikadu, materiál hirak ne’e entrega ona ba Departamentu Abastesimentu Bee nian hosi Ministériu Obras Públikas Timór.

Materiál ne’ebé entrega relasiona ho programa implementadu hosi USAID durante tinan haat ho valór dolár rihun 20 (besik euros milloens 15,4), hanesan ajuda atu sidadaun timor-oan hothotu hetan asesu ba bee-mos, saneamentu bázika no jestaun rekursu naturais.

Programa koperasaun ne’e termina iha 2012. Desde 2001, Estadus Unidus apoia Timor-Leste ho dolár milloens 300 (besik euros milloens 231) iha programa ajuda ba dezenvolvimentu. Iha 2013, apoiu ne’ebé fó besik dolár milloens 12 (besik euros milloens 9,2).

SAPO TL ho Lusa

Amnistia Internasionál dezafia parlamentu timoroan hodi halo altersaun ba lei imprensa

Amnistia Internasionál (AI) horisehik dezafia parlamentu Timor-Leste hodi halo alterasaun sira ba lei imprensa nian tuir akordu ho desizaun hosi Tribunál Rekursu nasaun nian, ne’ebé konsidera katak artigu balun la tuir konstituisaun.

“Amnistia Internasionál apela ba parlamentu Timor-Leste nian atu garanti katak tenki haree fali lei tuir akordu ho direitu internasionál, direitu ema sira nian no liberdade espresaun, liuliu, hodi garanti katak sei la limiti jornalista sira ninia serbisu lejítimu”, haktuir hosi AI iha komunikadu.

“Organizasaun preokupadu atu parlamentu bele avansa ho ratifikasaun ba lei ne’ebé bele impede liberdade espresaun iha nasaun”, nia hatutan.

Tuir AI, ativista timoroan sira nian fiar katak “lei ne’e promulgadu ona hodi impede jornalista lokál no estranjeiru sira atu informa kona-bá hahalok korupsaun, nepotizmu no jestaun finanseiru aat iha Timor-Leste”.

Lei imprensa timoroan ne’ebé hetan diskusaun aprova ona hosi parlamentu nasionál iha fulan-Maiu tinan 2014, maibé Prezidente Timor-Leste nian, Taur Matan Ruak, haruka ona lei ba Tribunál Rekursu, ne’ebé konsidera ona katak pozisaun balun viola Konstituisaun.

Referencia Husi: Sapo TL ho Lusa

MAF Timor-Leste simu aviaun daruak to’o tinan ne’e remata

MAF Timor-Leste sei iha aviaun daruak, to’o tinan ne’e remata, ne’ebé sei permiti hodi reforsa prestasaun servisu aéreo no emerjénsia umanitária ne’ebé hahú iha 2007,iha territóriu, hodi hatán pedidu ida Ministériu Saúde nian, newsavia fó sai.

Foto: News Avia

MAF (Mission Aviation Fellowship) ne’ebé iha baze ida iha Queensland, Austrália, maka nu’udar organizasaun internasionál kristaun ida, la buka lukru ruma, maibé iha misaun ida ba presta servisu no ajuda, liuhosi meius aéreo, populasaun ki’ak sira, ne’ebé hela iha fatin izoladu sira no susar hetan asesu, ká tanba hetan asesu mós la di’ak. A MAF, hanesan slogan “Flying for life” (Somo buka Moris) iha nasaun 25 no semo ba fatin 1.800.

“Ema, ne’ebé ami serbisu ba, la hanoin aviaun ne’e hanesan luxu, maibé atu hanesan ai-kabelak ida hodi bele salva”, deklara ba Newsavia, Jonathan Lowe, koordenadór MAF – Timor-Leste.

Aviaun foun ne’ebé marka ona ba Timor-Leste sei iha ekipamentu no pinta iha  baze manutensaun nian husi organizasaun, iha Mareeba, besik Cairns, iha estadu australianu Queensland. Hato’o obrigadu barak ba kampaña angariasaun fundu nian ida no sei hamutuk ho GA8 Airvan ne’ebé halo servisu iha 2007, haktuir newsavia.

Desde hahú halo operasaun iha Timor-Leste, ekipa sira husi MAF konta ho voo durante oras 2.700 iha país. Internasionalmente, no halo de’it iha tinan kotuk, MAF semo liu oras 52.000.

Ba servisu MAF – Timor-Leste iha pilotu australianu rua, no família sira, no funsionáriu timoroan tolu.

Misionáriu sira ne’e ba tun fatin ualu iha país refere: Oecussi, Maliana, Suai, Same, Los Palos, Baucau, Dili no Illa Ataúro (pista ne’e loke hikas fali).

Iha Viqueque, sei restaura pista, iha kosta sudeste nian.

Voos iha nasaun ne’e la dook. Ezemplu, ba Illa Ataúro lori minutu 13, hahú husi baze Díli, no destinu ne’ebé dook liu mak, Los Palos, ne’ebé lori minutu 50.

Atua uitoan iha mundu tomak, iha tinan 60, MAF semo ona ba rai-fuik, foho, pántanos no rai-fuik maran ho objetivu sai ikun ba nesesidade ema rihun, proporsiona ba sira apoiu materiál no espirituál

Serbisu ida ne’ebé halo hela ho parseria ho Ministériu Saúde, ho voo emerjénsia 100 resin, kada tinan, ba fatin sira ne’ebé izoladu liu no ospitál prinsipál país nian, iha kapitál, Díli.

Iha voo sira ne’e, ekipa médiku sira sei halo espesializa ba prestasaun kuidau dahuluk ba lokál.

Tanba saida maka osan labele halo buat hotu, no barreira linguístika mak real, Jonathan Lowe no elementu sira seluk husi MAF Timor-Leste sente mós katak gratifikadu bainhira sira simu ho hamnasa ká kaer liman ho ema sira ne’ebé ajuda ká ba se maka sira halo servisu aéreo. Hahalok simples  ne’ebé ema atu labele halo maka dezlokasaun husi estrada sira ne’ebé iha kondisaun aat tebe, ne’e sai hanesan ajuda ida ne’ebé timoroan sira preza no agradese ba MAF Timor-Leste, fó sai newsavia.

Aviaun ne’ebé halo ona operasaun husi MAF Timor-Leste (iha tempu oin mai, aviaun sira), mak GA8 Airvan, aeronave utilitária fabrika iha Austrália, husi performanse bobot sira, hodi hanoin katak aviaun ne’e bele tun ba meius remotus, atu bele tun no deskola iha pistas kurtu sira.

Rferencia : SAPO TL ho Newsavia