PM lamenta ho atuasaun hosi Austrália kona-ba kestaun fronteira marítima

Primeiru ministru Xanana Gusmão ohin kritika Austrália iha diskursu ne’ebé nia halo iha 69.ª Asembleia-jerál ONU bainhira husu kona-ba limitasaun fronteira maritime entre nasaun rua nomós atuasaun hosi multinasionál iha nasaun hirak ne’ebé ki’ak.

Maski lahaktuir diretamente naran hosi nasaun viziñu ne’e, maibé Xanana Gusmão alerta iha ninia diskursu atu “define lolos no ho seriedade kona-ba fronteira maritime entre nasaun ne’ebé hamriik iha direitu internasionál nia okos”.

“Iha 2002 bainhira ami ukun-aan ona, ami hasoru mundu globalizadu ne’ebé nakonu ho arogánsia no ambisaun ne’ebé maka’as, aproveita inexperiénsia no ignoránsia hosi ema ki’ak no kiik sira hodi komete hahalok bosok no ladi’ak ne’ebé sai nu’udar insultu ida ba valór universál”, hatutan Xanana Gusmão.

Primeiru ministru dehan tan katak “multinasionál bobot sira sempre hatene halo papel imprópriu no desleál, hala’o ho desonestidade no ladi’ak bainhira lida ho nasaun hirak ne’ebé ki’ak”.

“Timor-Leste hanesan nasaun joven, kiik no ki’ak, ne’ebé mós lakonsege hasees-aan hosi hahalok manipulasaun no bosok no hakarak kontinua fi’ar katak mekanismu internasionál hanesan Konvensaun hosi Nasoens Unidas kona-ba Direitu Tasi bele fó kontribuisaun ne’ebé iha lia-los entre nasaun no entendimentu entre povu hodi defende lia-los no direitu soberanu”, dehan Xanana Gusmão.

Timor-Leste akuza formalmente Austrália iha Tribunál Permanente Arbitrajen iha Haia tanba kazu espionajen bainhira nasaun rua halo negosiasaun kona-ba Akordu gás no mina iha Tasi Timór.

Ho arbitrajen internasionál, Timor-Leste hakarak atu anula tiha akordu ne’ebé iha, atu nune’e bele halo fali negosiasaun hodi bele kria limitasaun hosi fronteira maritime no hasai proveitu hothotu hosi ninia rekursu petrolífera.

Paralelamente, Estadu Timór mós hahú hala’o asaun judisiál oioin hasoru empreza petrolífera hothotu tanba deskunfia lakohi selu impostu ba petróleu. 
Sapo TL