CRUZ JOVEN, SINAL LIBERTASAUN NASIONAL BA SARANI HOTU

DILI - Prezensa kruz joven ba sarani iha mundu, liu-liu sarani sira iha rai doben Timor-Leste impor­tante tebes, tanba kruz nudar sinal libertasaun ba sarani Katoliku iha mundu tomak.

Hafoin halao vizita durante kuaze fulan rua hahu husi 13 de Marsu 2015 too 9 Maiu 2015 iha Diocese Maliana hodi vizita parokia 10, nebe pertense ba Diocese Maliana, prezensa Kruz Joven ho nain feto Inan Peregri­na, entrega hikas fali mai Diocese Dili.Seremonia entrega Kruz Joven no Inan peregrina nee, halao iha Selamat Datang, Tasi Tolu, baliza entre diocese Malia­na ho Diocese Dili, Sabado (9/5/2015).

Kruz Joven ho Inan Pere­grina antes nee halao visita iha parokia sao Joao Brito, Liqu­ica, nu­nee parokia Liquica husi diocese Maliana mak entrega mai Diosese Dili, nebe simu husi Parokia Santo Francisco Assis, Dare.

Iha seremonia entrega Kruz joven ho Nain Feto Inan Peregrina nebe parokia Sao Joao Brito entrega ba Parokia Sao Francisco Assis Dare, Bispo Diocese Malia­na, Dom Norberto do Amaral hatoo agradese ba Maromak, tanb­a haraik ona oportunidade ba Diocese Maliana atu bele hafoun, hafanun sira nia fiar durante visita kruz joven.

D. Norberto hateten prezensa ilas kruz joven ho nain feto bele realize too entrega ba Diocese Dili lao ho diak, tamba kolaborasaun diak entre sarani hotu, inklui husi parte seguransa, no liu-liu tamba domin nebe sarani sira hatudu ba Jesus ho Maria.

“Hanesan uluk hau dehan katak Krus ho ilas Nain Feto nee sinal deit, importante mak nee ita nia fuan, tenki hafoun atu jesus hla iha ita nia fuan ida-idak, se ida nee mak laiha percuma, hau dehan dala ida tan, ita halai-halai tutuir deit, iha interega sira nee ita nia mataben suli ba nee ou balun nebe mate durante iha prosesu nee mos ita la hetan buat ida, maibe wainhira ita hafoun ita nia an, hodi buka moris tuir ita nia fiar, tuir buat nebe konferensia episkopal fo sai tena katak atu hafanun ita, hametin ita nia fiar, haklean ita nia fiar hodi moris diak iha sarani nebe diak I ema nebe diak ida nee importante tebes” dehan D. Norberto, iha seremonia entrega kruz Joven no Ilas Nain Feto Peregrina, iha Tasi Tolu, Sabado (9/5/2015).

Iha oportundade nee mos D. Norberto hodi Diocese Maliana nia naran, hatoo agradese ba parte hotu, liu-liu ba Polisia sira, Tranzitu, UPF nebe iha Maliana halai tun sae, tuir kruz ida nee. Hodi Dioseze nia naran mos hatoo agradese ba servisu, kolaborasaun husi parte too prosesu intrega Kruz Joven no Inan Peregrina ba Diocese Dili.

Iha fatin hanesan Admi­nis­trador Apostoliku Diocese Dili, Dom Basilio do Nasci­mento haktuir, evanjellu Jesus Kristu nebe dehan reinu Lalehan hanesan mostarda musan nebe kiik liu iha musan hotu-hotu nia let, maibe musan oan nee kuandu monu ba rai, nia sai ai hun boot ida nebe manu lalehan nian hotu-hotu mai tau sira nia an iha ai nee nia leten.“Ohin tinan ida nee kuandu lao halaeu Timor, ita hanoin fila fali mostarda musan ida nee kuandu tama iha timor tinan ats lima liu ba, la hatene misionariu sira iha momentu neba nee hetan sakrifisiu saida, misionariu sira iha tempu neba ba hetan bolsa iha nebe, maibe buat nebe ohin ita sarani Timor selebra maka tamba misionariu sira nia forsa ida nee halo katak Jesus Kristu nia modo musan ida nee tama iha nee I sai buras,” dehan D. Basilio.

Nia esplika, oinsa mak modo musan nee buras iha Timor, sai fuan hodi halo rai nee hili katolikizmu sai sira nia identidade, hodi hare ba Kruz Ho Nossa Senhora hanesan bandeira sarani nian ho kultura nee hotu, evanjellu mai fo naroman ba buat hirak nebe beiala sira uluk uja hodi buka dalan atu ba hasoru maromak, maibe ohin loron kruz sai naroman ba ema hotu.

Dom Basilio esplika liu tan katak sarani hotu iha mundu nee lao hanesan ema sira nebe halai estafeta, 400 meter, iha desportu ema nain haat nebe halai metro 100, I depois sira kaer sinal ida hodi fo ba malu. Situasaun nee mak oras nee akontese iha Timor nebe sarani sira halao iha tinan ida nee, husi parokia-parokia, husi diocese ba diocese Timor oan hotu halai iha estadium ida. Husi parokia ida ba parokia seluk, husi diocese ida ba diocese seluk, sarani sira kaer iha liman naroman fiar nian hodi hatudu ba an rasik I mos ba rain doben Timor.

Iha lia fuan ikus D. Basilio repete tan dom Norberto nia lia fuan hodi husu ba sarani sira atu keta kontenti deit ho ema barak nebe tuir Kruz Joven no Nain Feto Peregrina.

“Hau halimar dehan katak tuir lolos nee ita Timor nee mesak santu deit, 97% katoliku nee tuir los mesak santu deit, maibe kuandu ita hare se mak oho malu, katoliku deit, se maka ba naok ema nia sasan, katoliku deit, se mak hadau ema nia fen, ema nia laen, mesak katoliku sira, se mak soe tia feto boot hodi hola fali feto kiik, katoliku deit, maibe kuandu tuir krus nee, inan ferik, jesus mos hakfodak, nebe hau hanoin katak tempu mos atu ita kaer kristu nia lia fuan, Timor moris ho ita nia an rasik hodi hatudu katak laos deit kuantidade nee mak furak, maibe oinsa mak ita ida-idak halo konversaun ba ita an rasik, needuni obrigadu barak ba diocese maliana, obrigada barak ba parokia Sao Joao Brito Liquica, buka atu haburas fiar nee iha parokia nee nia laran, wainhira Krus Joven ho Nosa Senhora iha imi nia leet,” dehan D. Basilio.

Nunee mos komisaun organizadora husi Parokia São João Brito Liquica, Luis Lobato, iha oportunidade nee mos hatete hanesan komisaun organizadora, senti hakmatek, malirin, hamutuk ho kruz joven. Ho nunee sira Liquica hakarak hanaran kruz joven nee ho naran Kruz Libertasaun Nasional, tamba krus nee hametin joven­tude hotu, nebe hanoin la hanesan, atu simu ukun rasik an, kaer Timor Leste.

“Ohin Diocese Maliana liu husi munisipiu Liquica, ami intrega ba Munisipiu Dili, atu kuidadau, hahi hanai nafatin hanesan veteranus ida iha timor Leste. Lia fuan mak nee deit, ami Liquica durante iha diocese Maliana, ami senti lalehan besik hela diocese Maliana,” katak Luis.

Nia hatutan ohin hakarak ka lakoi sira tenki intrega ba dioseze Dili, liu husi Bispo Baucau, Administrador Apostoliku Dioseze Dili nian, ho laran kontenti no hakosolok, entrega ho diak ho haraik an tomak ba uma kreda, Uma Lulik Iha Timor Leste. tamba nee komisaun organiza­dora husi munisipiu Liquica hatoo obrigado barak.

Observasaun STL iha terenu nota kata, sarani husi Diocese maliana, ho laran triste husi Kruz Joven ho Nain Feto Inan Peregrina. Iha seremonia entrega kruz joven nee, partisipa husi Bispo Diosese Maliana, Dom Norberto do Amaral, Administr­ador Apostoliku Dioseze Dili, Dom Basilio do Nascimento, padre, madre husi diocese Maliana no Dili, Ministru Comersiu Industria no Ambiente (MCIA) Antonio da Conceicao, inklui sarani husi diocese Dili ho Maliana.

Kruz Joven no Nain Feto Inan Peregrina nebe entrega husi Parokia Sao Joao Brito diocese Maliana, simu husi diocese Dili, liu husi Parokia sao Francisco Assis, Dare.

Hafoin entrega Kruz Joven no Inan Peregrina husi diocese Maliana mai diocese Dili, kontinua ho prosesaun nebe halao husi selamat Datang, Tasi Tolu mai too iha Uma Adat Tasi Tolu, kontinua prosesaun ho kareta ba Parokia Dare. Proses­aun Kruz Joven no Nain Feto Inan Peregrina nee, hetan seg­uransa masimu husi parte seg­uran­sa, hanesan PNTL husi Uni­da­de Tranzitu, no Escuteiru sira.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Problema Veteranu Taur- Xanana Sei La Husik Ba Jerasaun Foun

HATULIA- Prezidente Republika Taur Matak Ruak sei hamutuk ho eis Primeiru Ministru Xanana Gusmao, Rezolve Problema veteranu iha nasaun Timor Leste no promote sei la husik Problema nee ba Jerasaun foun sira.

Prezidente Republika Taur Matan Ruak fo sai deklarasaun nee hodi hatan preokupasaun povu iha Suku Samara, postu Administrativu Hatulia, Munisisipiu Ermera durante dialogu ho Komonidade sira.

Problema veteranu hau hamutuk ho maun Xanana, Ami nia promesa ka ami sei lakohi husik hela problema nee ba, ita nia oan sira, husik sira ukunno hare mak Estrada no dezemvolve buat seluk,” dehan Taur ba povu Suku Samara, kuarta (27/05/2015) iha Suku Samara.

Taur hatete tan katak tuir lei veternu sira nebe maka halo falsifika dadus kuandu lori ba tribunal sei lakon direitu, tamba nee labele falsifiku, Veteranu sira bele bosok ohin maibe loron ruma sei deskobre tamba nee husu atu koalia los.

Iha fatin hanesan liu husi sesaun husu no hatan Komonidade suku samara Idelfonso Maria da Conceicao husu Prezidente hodi esplika kona ba veteranu falsu no vetaranu nebe lolos, tamba nia parte ladun komprende asuntu nee.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Governu avansa, ho reforma administrasaun nian iha loron 100 dahuluk

Hapara kontratu foun, halo revizaun hosi kuadru jurídika funsaun públika no aprova mekanismu foun ba ezekusaun rosamentál sai nu’udar aspetu balun ne’ebé fó sai ba loron 100 dahuluk hosi VI Governu Konstitusionál. 

Primeiru ministru Rui Maria de Araújo, ohin iha konferénsia imprensa ne’ebé hala’o iha Palásiu Governu, aprenzenta aranke hosi serbisu ninia ezekutivu nian ne’ebé aposta ba iha reforsu kualidade serbisu públiku nian, bainhira simu pose iha fulan fevereiru.

Tuir testu, Governu fó ona pasu dahuluk ba iha reforma administrasaun públika, inklui mos liu hosi akordu ida hodi implementa Auditoria Sosiál ba iha Serbisu Estadu nian.

Hahú mós ho faze daruak hosi Programa Diagnóstika Nasionál kona-ba kapasidade instituisaun públika nian ho rekrutamentu ba kordenadór reforma fiskál nian ida ba reforma rejime fiskál.

Maski nune’e ladauk fó sai klaru kona-ba reforma ne’ebé sei hetan apoiu hosi espesialista portugés sira, inklui alterasaun impostu kona-ba rendimentu ho introdusaun IVA nian.

Hatan ba jornalista sira, Rui Maria de Araújo ko’alia mós kona-ba polémika foun ne’ebé iha ligasaun ho asesór internasionál Governu nian, fó sai iha artigu imprensa lokál nian.

“Governu sei atu hamenus despeza supérfluas. Maibé Timor-Leste presija asesór internasionál sira, tanba ne’e maka asesór sira la’os supérfluous. Ami presija espesialista, ezemplu ba iha área jurídika”, dehan.

“Iha termu referénsia, planu serbisu. Karik asesór sira la kumpri sira-ninia responsável, sira-ninia supervisor bele hapara sira-ninia serbisu”, dehan.

Iha parte seluk, Rui Araújo, rejeita kona-ba kampaña kontra grupu espesífika asesór nian ida, no dehan katak lahatene tanba saida maka halo divulgasaun kona-ba saláriu hosi asesór internasionál balun, kuaze hosi Prezidénsia Konsellu Ministru nian bainhira sei iha mós seluk, hanesan iha Ministériu Finansas ne’ebé ho saláriu bot liu.

“Hatene kona-ba preokupasaun hosi problema asesór. Ami tenke serbisu ba iha dezenvolvimentu rekursu umanu. Maibé asesór sira importante ba iha área hirak ne’ebé sai nu’udar xave”, dehan. Aspetu seluk hosi loron 100 dahuluk, nomeia ona komando PNTL foun, aprova reforma lei migrasaun no asilu no halo regularizasaun ba uzu propriedade Estadu 364.

Semana ne’e rejista ona parsela terenu kona-ba projetu Sistema Nasionál Kadastru 17.448, ne’ebé implementa hosi konsórsiu entre empreza timor-oan GMN-H ho empreza portugés ARM- APPRIZE.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

UE no Timor-Leste asina akordu ba izensaun vistu ho durasaun badak

Uniaun Europeia no Timor-Leste asina ohin, iha Bruxelas, akordu isensaun vistu ho durasaun badak, ho aplikasaun imediata ba títulu provizóriu wainhira sei hein aprovasaun ne’ebé maka presiza hosi Parlamentu Europeu.

Atuál prezidénsia rotativa “letã” Konsellu UE nian anunsia katak rejime foun fó izensaun vistu sidadaun komunitáriu ne’ebé hala’o viajen to’o Timor no sidadaun timoroan ne’ebé sai ba Uniaun Europeia ho estadia ne’ebé la liu hosi fulan tolu iha kada períodu iha fulan neen.

Hodi benefisia izensaun vistu, naton ba sidadaun UE no Timor-Leste nian iha pose pasaporte normál, aplika rejime ba kategoria hotu ema nian no ho kualker objetivu, ho esesaun sira ne’ebé halo dezlokasaun hodi ezerse atividade remunerada.

Sai hosi ámbitu akordu nian ne’ebé sai hanesan ábitu, Reino Unido no Irlanda, nasaun ne’ebé iha kláuzula esesaun, no ba sira ne’ebé sei kontinua aplika ezijénsia prevista iha respetiva lejislasaun nasionál iha matéria vistu nian.

Desizaun kona-ba konkluzaun akordu ne’ebé asina ona iha Bruxelas agora sei haruka ba Parlamentu Europeu, hodi haree ba aprovasaun ne’ebé maka presiza hosi asembleia, maibé ida ne’e sei aplika ho títulu provizóriu hahú ohin, esklarese prezidénsia “letã” UE nian.

Iha serimónia asinatura akordu nian, governu Timor-Leste reprezenta hosi vise-ministru Negósiu Estranjeiru no Kooperasaun, Roberto Sarmento de Oliveira Soares.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Prostituta Estranjeiru Selu Taxa, Governu Taka Ibun

DILI- Estranjeiru sira nebe mai iha Timor Leste (TL) halao vida negosiu liu husi dalan prostitusaun, sira kumpri lei, hodi selu taxa ba Governu, tamba nee Governu taka ibun, no prostituta sira nee kontinua loke liras iha TL.

Liha hirak nee hatoo husi feto prostitua Yanti Sharanyi, ba STL iha sira nia knar fatin Colmera, Dili, Sesta (22/05/2015).

Hau mai iha nee ho hau nia kolega sira, serbisu halao vida prostitusaun nia durante tinan 3 resin ona faselita husi kompania nasional balun iha Timor, tamba nee ami hala serbisu ida nee selu taxa ba Goveru, neduni ami nia vistu mos faselita husi imigrasaun, koandu vistu mate ami ba hamoris husi fulan 6 ou tinan 1,” hateten Yanti.

Mesmu sira selu taxa, maibee feto prostitua estranjeiru sira nee mos, kada semana ba aprezenta aan iha Polisia dala rua, tamba nee sira la tauk, sira mos fulan-fulan sempre cek up iha Hospital.

Iha parte seluk Direitur AJAR Jose de Olivera hateten husi prespektiva lei tributaria regula katak se maka hetan rendimentu liu 500 dolar, nia iha obrigasaun atu selu taxa.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Portugés hanesan lian ofisiál iha eis-koloniál hanesan “solusaun prátika liu”

Adota lian portugés hanesan lian ofisiál iha eis-koloniál afrikanu portugés “hanesan solusaun ida ne’ebé prátika liu” no “mosu naturalmente”, dehan eis-membru hosi Casa dos Estudantes do Império, ne’ebé oras ne’e hanesan dirijente polítika hosi nasaun hirak ne’e ba Lusa. 

Besik tinan 40, no kuaze totál hosi Estadu afrikanu ne’ebé ohin loroin halo parte iha Nasaun Lian Ofisiál Portugés (PALOP), hetan ona indepenéndia hosi Portugal liu hosi konflitu armada. Ho proklamasaun independénsia, nasaun hothotu desidi uza portugés hanesan lian ofisiál.

Bainhira Lusa husu kona-ba opsaun ne’ebé nasaun afrikanu sira tuir, eis-primeiru ministru Angola Fernando Fransa Van-Dúnem dehan katak “nunka iha konsertasaun” entre antigun asosiadu hosi Casa dos Estudantes do Império ne’ebé depois asumi funsaun polítika iha nasaun hirak ne’e, hodi adota portugés hanesan lian portugés.

Preferénsia “mosu naturalmente”, dehan Van-Dúnem, hetan ajuda hosi eis-prezidente kaboverdianu Pedro Pires, ne’ebé haktuir katak ida ne’e hanesan “solusaun prátika ida” ba Estadu afrikanu foun sira.

“Hanesan intrumentu únika (…) hosi ema idaidak ninia liamn no ami tenke uza. Lian hanesan meiu komunikasaun, difuzaun no kultura, tanba ne’e maka hanesan ne’e duni, ami laiha tan lian seluk. Hanesan solusaun ida ne’ebé prátika liu, tanba hanesan lian hakerek nian, komunikasaun ne’ebé maka ami aprende (…) no halo ami-ninia estudu”, dehan.

Durante tinan ne’ebé funsiona (1944-1965), Casa dos Estudantes do Império asumi papel importante hodi hamosu konsiénsia krítika entre juventude oriunda kolónia nian, ba iha konstentasaun ba rejime no domíniu koloniál, hodi deskobre sira-ninia identidade kulturál (Orijen hosi Áfrika barak, Goa, Makau ka Timór), ba iha konsesaun hosi projetu polítika foun.

Tuir Uniaun Sidade Kapitál Lian Portugés (UCCLA) fatin refere “sei sai hanesan espetativa ofisiál hosi obediente ida no aliñadu ho ideolojia imperiál”.

Iha deklarasaun ba Lusa, Pedro Pires defende, liu-liu kona-ba nesesidade “hodi fó valór” ba lian afrikana nian hothotu, hafoin halo tiha vizita ba eis-kadeia Aljube, atuál Muzeu Rezisténsia no Liberdade, nomós hanesan fatin ba Casa dos Estudantes de Império, iha Lisboa.

Durante oras barak, antigun xefe Estadu no Governu na’in lima hosi Angola (Fernando Fransa Van-Dúnem), Mosambike (Pascoal Mocumbi ho Mário Machungo) São Tomé e Príncipe (Miguel Trovoada) no Kaboverde (Pedro Pires), la’o haleu eis-kadeia Aljube nomós Institutu Superiór Agronomia, iha Lisboa, hanesan fatin ne’ebé fundadór PAICG, Amílcar Cabral estuda ba. Iha deklarasaun ba Lusa, sekretáriu jerál UCCLA, Vítor Ramalho konsidera katak sira ninia instituisaun halo “ buat barak” hodi introdus portugés hanesan lian serbisu iha PALOP, hafoin independénsia, tanba protagonist hosi movimentu libertasaun pasa liu hosi Portugal.

“Hosi ne’e kedas maka jovens sira publika ona antolojia poétika tolu, hosi Angola, São Tomé e Príncipe no Kaboverde. Sira mós publika livru poezia kiik 22 no hametin identidade hosi nasaun hirak ne’ebé sira mai no poezia ne’e ho autór rasik hanesan personalidade absolutamente inultrapasável tuir pontu de vista cultural hosi ami-rain”, dehan Vitor Ramalho.

Hanesan ezemplu, responsável ne’e fó sai naran hosi poeta oioin, hahú hosi José Craveirinha “ne’ebé hakerek barak ba Casa dos Estudantes do Império” ba to’o Rui Monteiro, autór hosi Hino Angola nian, inklui mós Amílcar Cabral. 

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Sei hala’o selebrasaun ofisiál 13º aniversáriu independénsia iha Maliana

Sidade Maliana, kapitál munisípiu fronteira hosi Bobonaro, iha loron-Kuarta sei hala’o komemorasaun ofisiál 13º aniversáriu restaurasaun independénsia Timor-Leste, ne’ebé sei partisipa hosi individualidade timoroan importante sira.

Foto: Epifânio Sarmento @SAPO TL

Prezidente Repúblika, Taur Matan Ruak, prezide komemorasaun ne’ebé sei hala’o ho parada militár ida no serimónia ofisiál hasa’e bandeira.

Hafoin hala’o tiha minutu de silénsiu sira sei entrega, simbolikamente, kartaun espesiál identifikasaun nian hosi kombatente libertasaun nasionál no prémiu ba suku sira ne’ebé rekoñese tanba implementa ábitu saudável iha komunidade sira no han ai-han ne’ebé fó nutrisaun di’ak.

Relasiona ho komemorasaun sira iha tinan ida ne’e, xefe Estadu, Taur Matan Ruak, sei fó galardaun ba organizasaun no sidadaun estranjeiru oioin ho grau tolu ka haat hosi Ordem de Timor-Leste (colar, medalha e insígnia) "tanba sira ninia kontributu no apoiu ba luta autodeterminasaun Timor-Leste nian".

PALOP no sidadaun no organizasaun portugés sira, inklui eis-prezidente kámara Lisboa João Soares, bispu Manuel da Silva Martins, jornalista Adelino Gomes no TSF sei  simu kondekorasaun fulan ida ne’e iha Timor-Leste.

Ho grau prinsipál hosi Ordem de Timor-Leste, Colar, sei fó kondekorasaun Países Africanos de Língua Oficial Portuguesa (PALOP), eis-autarka João Soares, inteletuál Noam Chomsky no, títulu póstumu, padre anglikanu Walter Lini, ne’ebé sai primeiru-ministru fundadór Vanuatu.

Totál ema 27 no organizasaun sira sei simu kondekorasaun ho segundu grau, Medalha, entre maka ba eis-primeira-dama timoroan Kirsty Sword Gusmão, jornalista sira ne’ebé mate iha Balibo iha tinan 1975 Gary Cunningham, bispu Manuel da Silva Martins no TSF.

Entre kondekoradu sira ne’e sei iha mós ativista australianu oioin sira, portugés Adelino Gomes, Adriano Moreira no Luísa Teotónio Pereira.

Sei rekoñese mós, entre sira seluk, organizasaun sira hosi  Asia Pacific Conference on East Timor/Initiatives por International Dialogue (APCET/IDD) (Filipinas), a portuguesa A paz é possível em Timor-leste (APPTL), o East Timor Alert Network (ETAN) do Canadá, o East Timor Ireland Solidarity Campaign (ETISC) no Plataforma Internacional e Juristas para Timor-LEste (PIJTTL).

Ho insígnia maka kondekoradu jornalista sira José Vegar no Peter Cronau no Stephen John Langford no William Bennett Bartlett.

Portugal sei reprezenta iha komemorasaun sira hosi sekretáriu Estadu Administrasaun Lokál, António Leitão Amaro.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Falta osan atu portugés sai lia-ofisiál iha organizasaun internasionál sira - CPLP

Komunidade Nasaun Lia-Portugés (CPLP) la iha orsamentu sufisiente hodi introdús portugés hanesan lia servisu nian iha organizasaun internasionál hotu, lamenta espesialista barak iha Cidade da Praia, horisehik. 

Observasaun ne’e halo hosi diretora jerál Komunidade Nasaun Lia-Portugés (CPLP), Georgina Mello, hosi diretora ezekutiva Institutu Internasionál Lia-Portugés nian (IILP), Marisa Mendonça, no hosi koordenadór Komisaun Temátika Promosaun no Difuzaun Lia-Portugés nian, Eugénio Anacoreta Correia, durante konferénsia hodi komemora Loron Lia-Portugés no Kultura iha CPLP.

"Introdús lia-portugés signifika orsamentu importante tebes ida ne’ebé ita la iha hodi kobre organizasaun internasionál sira hotu", komesa hatete ba ajénsia Lusa Georgina Mello, no rekorda katak iha tinan balun halo tentativa hodi introdús portugés iha reuniaun Unesco nian balun, maibé folin liu hosi euro millaun 5 iha kada tinan.

"Folin ida ne’ebé aas tebes no iha momentu ne’e ita la iha kondisaun orsamentál da ida ne’e", nia rekoñese, no husu apoiu hosi embaixada no reprezentasaun diplomátika sira hosi nasaun CPLP nian iha kapitál iha ne’ebé organizasaun sira iha.

Lamenta "limitasaun objetiva" hirak ne’e, diretora jerál CPLP nian indika, entretantu, katak embaixada hosi nasaun sira CPLP nian ne’ebé reprezenta iha Jenebra, iha ne’ebé sei akontese iha reuniaun ministru Traballu sira nian tuir mai, enkara ona posibilidade ne’e.

Iha nia tempu, diretora ezekutiva Institutu Internasionál Lia-Portugés (IILP), Marisa Mendonça, hatete katak ne’e hanesan kestaun ida ne’ebé sei depende ba nasaun hotu no wainhira lia- portugés to’o iha organizasaun internasionál sira sei valoriza ho forma seluk.

"Dala ruma ita iha tendénsia atu to’o iha organizasaun internasionál sira no ko’alia ingléstanba fasilita komunikasaun, maibé karik ita halo ida ne’e ita anula ideia katak presiza mós atu portugés sai lia-servisu efetiva", nia defende.

No koordenadór Komisaun Temátika Promosaun no Difuzaun Lia-Portugés nian, Eugénio Anacoreta Correia, husu liu apoiu Estadu hotu nian no CPLP rasik, tanba servisu ne’e karun tebes ba lia ho falante millaun 250 iha mundu tomak.

"Ne’e hanesan mós problemaida ne’ebé akontese tanba falta meiu, tanba iha organizasaun internasionál sira presiza selu tradutór, edisaun dokumentasaun no depende ba posibilidade atu iha meiu finanseiru hodi konsege atinji objetivu ne’e", embaixadór mós kompleta katak, ba sé maka desizaun ne’e foti ona, falta de’it halibur meiu ne’ebé presiza.

Iha organizasaun internasionál sira hanesan Uniaun Afrikana no Uniaun Europeia, no rejionál hanesan Komunidade ba Dezenvolvimentu Áfrika Austrál (SADC) ka Komunidade Ekonómika Estadu Áfrika Osidentál nian (CEDEAO), portugés utilizadu hanesan lia-servisu nian.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

FM Konsidera Cowboy Membru Importante CRM laos CPD-RDTL

DILI–Fundasaun Mahein konsidera Cowboy nebe intregaan foin lalais nee, hanesan memru importante hosi grupu Consellu Revolusionariu Maubere (CRM) laos CPD-RDTL.

Tuir Diretor Ezekutivu Organijasaun Non Govermental (ONG) Fundasaun Mahein, Nelson Belo, ba STL iha ninia servisu fatin Comoro Kuarta (13/05) hatete katak hare ba evidensia nebe mak iha, Cowboy involve mos iha grupu CRM.

Primeiru atu dehan nia (Cowboy) membru CRM ou CPD-RDTL nee husik tribunal mak deside ami fundasaun mahein laiha kapasidade atu dehan ida nee, maibe hare ba evidensia fijikamente nia involve iha grupu Conselho Revolusionariu Maubere (CRM),” hatete Nelson.

Nia hatutan Fundasaun Mahein mos lamenta tebes ho deklarasaun Cowboy nebe mak liu hosi konferensia imprensa ba publiku, tanba Cowboy nia estatus hanesan arguido no FM mos la menta ho institusaun nebe mak suporta hodi halo deklarasaun, nee signifika katak laos Cowboy laiha direitu maibe so hetan lisensa hosi tribunal mak bele halo deklarasaun.

Iha fatin ketak tuir membru komisaun B Parlamentu Nasional nebe mak trata asuntu konaba defeja no siguransa, Cessar Valente de Jesus, mos hatete Cowboy labele defende nia an ona tanba kuaze ema hotu hatene katak nia hanesan liman los Mauk Moruk.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Amnistia denunsia prizaun no tratamentu ladi'ak iha operasaun konjunta iha Timor-Leste

Amnistia Internasionál (AI) horisehik fó sai detensaun arbitráriu no tratamentu ladi'ak ba ema sanulu resin durante operasaun nebe halo hamutuk entre polísia no forsa armada timoroan sira nebe halo hahú 23 fulan-Marsu iha parte balun iha leste Timor-Leste nian.

Iha komunikadu ida nebe haktuir organizasaun la'ós governamentál timoroan sira nian, AI hatete katak detensaun sira ne'e akontese iha distritu Baucau, iha leste Díli nian, "iha preokupasaun sira kona-bá seguransa" ba ema sira nebe detidu.

"Forsa seguransa timoroan sira kaer arbiru de'it no karik halo tortura ka laiha tratamentu di'ak ba ema sanulu resin iha Laga no Baguia iha fulan hirak ikus ne'e", esplika iha komunikadu ne'e.

"Insidente sira ne'e akontese hanesan parte balun hosi operasaun seguransa oioin nebe halo hamutuk entre polísia no forsa armada sira hodi kaer Mauk Moruk (Paulino Gama) no nia membru sira", refere dokumentu ne'e.

To'o agora, ajénsia Lusa seidauk hetan reasaun ida hosi Governu timoroan kona-bá akuzasaun hosi AI.

Iha komunikadu foun sira, organizasaun timoroan sira, inklui Fundasaun Mahein (FM), relata ona saida maka sira defini hanesan "informasaun inkrivel hosi instituisaun kredível ida" katak "númeru ba vítima inosente sira hosi operasaun hamutuk ne'e aumenta nafatin".

FM refere katak operasaun, ho naran kódigu Hanita no ho folin ida nebe liuona dolár millaun rua, "karakteriza hosi agresaun hosi forsa sira seguransa nian".

"Vítima inosente sira terus daudaun estraga kolaterál sira hosi operasaun Hanita: kontrolu iha estrada sira, verifikasaun ba identidade, revista uma sira, estraga sasán komunitáriu sira no tesi fu'uk ba labarik-mane sira nebe iha fu'uk naruk", haktuir hosi organizasaun.

AI refere katak iha dokumentadu "kazu sanuluk resin" hosi ema sira nebe akuzadu tanba tuir Mauk Moruk, nebe maka hetan "tebe no tuku dalabarak hosi forsa sira seguransa nian, durante sira nia detensaun".

Governu esplika ona iha fulan-Marsu katak aprova ona operasaun hamutuk entre Forsa sira Defeza Timor-Leste nian (F-FDTL) no Polísia Nasionál Timor-Leste nian (PNTL) hodi "prevene no hapara hahalok kriminozu sira hosi grupu ilegál sira nebe halo daudauk instabilidade iha nasaun".

Tuir autoridade sira, operasaun hamutuk ne'e hodi hatán ba atake sira hasoru ajente sira polísia nian nebe akontese iha Laga, iha leste kapitál nian, iha loron 15 fulan-Janeiru, no iha Baguia, iha sudoeste Díli nian, iha loron 08 fulan-Marsu liubá.

Governu garanti ona katak F-FDTL ho PNTl sei "halo atuasaun ho profisionalizmu no iha rigór nia laran no estabelese ona regra sira empeñamentu nian hodi hatán ba elementu sira krimi organizadu nian, identifikadu sira nebe hakarak hamosu instabilidade iha nasaun".

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Deskonfia Komete Krime Korupsaun, Vicente: “Kadeia ba Ema Laos ba Asu”

DILI- Deskonfia Prezidente Parlamentu Nasional Komete krime Partisipasaun Ekonomia ou Korupsaun, maibe too agora Parlamentu Nasional seidauk hasai imunidade, Vicente pronto hatan ba tribunal hodi tama Prizaun, tamba Prizaun halo ba Mane laos ba Animal.

Tuir Prezidente Parlamentu Nasional Vicente Guterres nudar Prezidente Parlamentu Nasional iha vontade rasik hakarak ba julgamentu, maibe ho kondisaun transmite diretamente husi televizaun, radiu no Prezensa husi ONG Nasional, Jornais Nasional inkliu entidade internasionai.

Hau latauk nudar prezidente parlamentu no nudar timor oan kadeia ba ema mane laos ba Asu hau prontu, hau pronto,” dehan Vicente ba Jornalista Tersa (12/05/2015) iha palasiu Prezidensial Nicolao Lobato, hafoin hasoru Malu ho Prezidente Republika Taur Matan Ruak.

Nia hatete Akuzasaun nebe maka halo ba Prezidente Parlamentu Nasional Halo Timor Leste nia rai nia naran foer teb-tebes, tan nee Ajente internasionais nebe maka klasifika Timor nia naran Aat teb-tebes partisipa iha Julgamentu prezidente parlamentu koruptu duni ou lae.

Iha fatin ketak Deputadu Bankada Fretilin Aurelio freitas Ribeiro hatete tuir Lei membru orgaun soberania kuandu atu ba hatan alegasaun ruma iha tribunal, parlamentu presiza hasai ninia imunidade.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Austrália entrega dokumentu konfiskadu iha atake ba advogadu timoroan

Funsionáriu Governu australianu fó fila iha loron-tersa ne’e, iha Camberra, dokumentu no dadus konfiskadu durante atake iha eskritóriu advogadu hosi Timor-Leste nian ida no ne’ebé detalla atividade espionajen Austrália nian kona-ba “Tratado do Mar de Timor”. 

Foto: Samuel Soares @SAPO TL

Iha komunikadu ne’ebé fó sai iha inísiu madrugada ohin, Governu timoroan esplika katak fó fali ona dokumentu sira durante loron-tersa lorokraik iha eskritóriu advogadu Bernardo Collaery, iha ne’ebé hetan prende iha loron 3 dezembru 2013.

Entrega dokumentu sira superviziona hosi embaixadór Timor-Leste nian iha Camberra, Abel Guterres.

Camberra komunika ona ba Tribunál Internasionál Justisa (TIJ) iha fulan marsu iha Haia katak "hakarak fó fila materiál", no iha loron 22 abril tribunál sai ona orden ne’ebé autoriza "retornu ba firma Collaery Advogados dokumentu no dadus hotu, sei taka metin (?) ho supervizaun hosi reprezentante Timor-Leste nian ne’ebé hili ba efeitu ne’e".

Entre materiál ne’ebé fó fila, ne’ebé prende iha atake, konta dokumentu relativu ho espionajen  Austrália nian iha Timor-Leste durante negosiasaun Tratadu kona-ba Determinadu Ajuste Marítimu iha Tasi Timor (DAMMT) iha tinan 2004, "konduta ne’e maka hanesan objetu disputa ida entre Timor-Leste no Austrália ne’ebé rejista iha Tribunál Permanente Arbitrajen [TPA] iha Haia", esplika Governu.

"Materiál jurídiku sira seluk ne’ebé rezervadu, prende iha fulan-Dezembru 2013 no ohin fó hikas ona, deskre estratéjia legál hosi Timor-Leste ba prosesu refere", esplika.

Devolusaun dokumentu sira sai hanesan reivindikasaun oioin ne’ebé aprezenta ona iha 17 Dezembru 2013, nota Governu timoroan, "kazu ne’e kontinua nakloke, ho TIJ hodi hatete katak hosi medida tolu ne’e iha rua maka provisória dekretada hosi tribunál iha fulan-Marsu 2014 válida nafatin".

Nomeadamente, "Austrália labele interfere, hosi dalan seluk, iha komunikasaun entre Timor Leste no sira ninia konsultór jurídiku sira ne’ebé relativamente ba arbitrajen pendente kona-ba Tratado do Mar de Timor de 20 maiu 2002 entre Timor-Leste no Austrália, iha futura negosiasaun sira bilaterál sira oioin kona-ba delimitasaun marítima, ka iha kualkér prosedimentu seluk entre Estadu rua ne’e relasiona ho kazu hirak ne’e, inklui kazu foin lalis ne’e, iha Tribunál."

Iha nota ne’ebé remetida ohin Governu timoroan fó hanoin fila fali katak iha fulan-Setembru tinan kotuk konkorda ona ho pedidu ida hosi Austrália hodi adia, ba fulan neen, tantu iha arbitrajen ne’ebé rejistu hamutuk ona hosi TPA, nomós prosedimentu perante TIJ relasiona ho prende dokumentu sira, "hodi permiti halo diálogu ida ne’ebé signifikativu liu".

"Iha períodu fulan neen nian ne’e sei remata iha fulan-Marsu. Espetativa Timor-Leste maka atu halo diálogu ne’ebé bele hamosu ajenda estruturada ida ba konversasaun kona-ba delimitasaun fronteira marítima permanente sira ne’ebé ladauk verifika", fó sai komunikadu Timór nian.

"Laiha fronteira marítima ne’ebé permanente entre nasaun viziñu rua ne’e, no Timor-Leste buka atu kompleta delimitasaun hosi sira ninia territóriu soberanu liuhosi dezeñu fronteira marítima permanente sira ho Austrália sai hanesan roman prinsípiu nian hosi direitu internasionál" esplika.

Timor-Leste estuda daudaun etapa sira tuir mai hodi fó kazu ida ne’e, fó sai komunikadu.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

PN Tenke Brani Diskute Lei Anti Korupsaun

DILI – Atu kombate korupsaun hosi koruptor sira, hakarak ka lakohi Parlamentu Nasional tenke brani atu diskute lei KAK, maske lei nee rasik regula mos membru deputadu.

Tuir Peskijador Ekonomia no Rekursu Naturais hosi Organijasaun Non Govermental (ONG) Lao Hamutuk, Juvinal Dias, ba STL iha ninia servisu fatin Bebora Kuarta (06/05) katak membru Parlamentu Nasional tenke brani atu diskute lei KAK.

Korupsaun nee problema bot ida mak estadu tenke hanoin no Parlamentu Nasional tenke brani atu diskute lei anti korupdaun nian no klaru katak lei nee atu regula ukun nain sira inklui deputadu sira no ba ema hotu nebe servisu iha goveru tanba nee sira tenke brani no nakloke ho fuan diak atu halo lei nebe mak bele regula mos sira nia aktividade,” dehan Juvinal.

Iha fatin ketak tuir Diretor Asosiasaun HAK, Manuel Monteiro, mos hatete membru Parlamentu Nasional rasik laiha boa vontade atu diskute Lei Anti Korupsaun, maske lei nee rasik iha ona Parlamentu Nasional tinan kotuk.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Relatóriu defende hodi hametin jestaun no lideransa majistradu timoroan sira

Tribunál timoroan sira, inklui hosi Rekursu, bele hametin kapasidade jestaun no lideransa hosi juíz sira no funsionáriu judisiál sira seluk, fó sai relatóriu ida ne’ebé setór justisa Timor-Leste analiza ona no fó sai iha loron-tersa ne'e.

Relatóriu, "Asesu ba Justisa: Funsionalidade Tribunál sira iha Timor-Leste"prepara hosi projetu Ba Distrito (no hetan apoiu hosi USAid) no tuir komunikadu ida hosi autór sira katak atu sai, hanesan "análize ne’ebé kle’an" hosi operasaun tribunál distritál sira hosi Baucau no Oecusse iha Tribunál Rekursu iha Díli.

Bazeia ba iha rekomendasaun 16 hosi relatóriu Tribunál Rekursu no Ba Distrito sei serbisu hamutuk iha área espesífika rua, maka hanesan hadi’a sistema rekolla dadus estatístiku sira no ninia análize no hasa’e kapasidade lideransa no jestaun majistradu sira nian.

Hosi rekomendasaun sira ne’e, relatóriu analiza hodi hadi’a prosesu no sistema sira nune’e hadi’a funsionalidade tribunál sira, inklui formasaun adisionál funsionáriu sira nian.

Inklui mós implementasaun sistema komputadór sira ne’ebé metin liu, rekursu operasaun online barak liutan, inklui e-mail no alterasaun prosedimentu sira iha jestaun arkivu no rejistu sira hodi ajuda atu rezolve kazu sira ne’ebé akumula ona.

Análize ne’ebé halo iha meadu 2014 ka molok halo desizaun hosi Governu no Parlamentu Nasionál timoroan nian ne’ebé duni sai majistradu internasionál sira ne’ebé ezerse funsaun sira iha Timor-Leste.

Responsável hosi estudu ne’e analiza aspetu sira hanesan prosesu pasajen kazu sira liuhosi sistema judisiál, impaktu hosi fatór oioin sira maka hanesan volume serbisu nian, lian, sistema rejistu no informasaun no kestaun prosesuál sira seluk.

Estudu ida ne’e halo bazeia hosi memorandu entendimentu ida ne’ebé asina ona ho Tribunál Rekursu, instánsia superiór iha Timor-Leste, hosi Ba Distrito hodi avalia kapasidade setór judisiál nian, liu liu kona-ba funsionalidade hosi tribunál distritál rua ne’ebé analiza ona.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Desizaun Emilia Seidauk Tama, TDD Seidauk Agenda Julgamentu

DILI-Tribunal Distrital Dili (TDD) seidauk bele marka loron julgamentu ba kazu Emilia Pires, tanba seidauk simu desizaun husi Tribunal Rekursu (TR).

Xefi seksaun krime TDD, Juliao da Cruz hatete, desizaun rekursu arguida Emilia Pires nian tribunal rekursu seidauk simu.

Presidenti Tribunal Rekursu, Guelerminu da Silva informa katak, rekursu husi arguida Emilia Pires nian, tribunal rekursu hasai ona desizaun hodi haruka ona ba iha Tribunal distrital Dili  iha fulan kotuk. No tribunal distrital Dili mak sei halo prosesu julgamentu ba arguida Emilia,” dehan nia ba jornalista iha edifisio Tribunal Rekursu, Caicoli, Tersa (05/05/15).

Nia hatutan, kuandu haruka ona ba iha Tribunal Distrital nee Tribunal Rekursu laiha kompetensia ona ba kazu nee. Tanba kompetensia tomak entrega ona iha Tribunal Distrital Dili.

Antes nee iha loron 23 de Marsu 2015 Tribunal Distrital Dili adia hikas prosesu audensia julgamentu ba arguida Emilia Pires ho Madalena Hanjam, ba kazu krime partisipasaun ekonomio em negosiu tuir artigu 299 kodigo penal Timor Leste, tanba sei hein desizaun husi Tribunal Rekursu kona ba arguida Emilia nia rekursu. Informasaun kompletu iha STL Jornal no STL Web, edisaun Kinta (07/05/2015).

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Dezenvolvimentu Portugés iha Timor-Leste depende ba jerasaun foun "urbana no edukada"

Jerasaun foun timoroan sira maka sei lidera potensiál transformasaun Portugés ne’ebé ko’alia iha Timor Leste ho variante lia ekivalente ho brazileira, afirma ohin investigadora Susana Afonso, hosi universidade britânica de Exeter. 
Tuir akadémika ne’e, Timor Leste la konsideradu hanesan ko’alia variante Portugés tanba rejista "nativizasaun" lia, ka, produsaun hosi falante "inovasaun" lingístika, ne’ebé, ironiza, ema barak bele konsidera sala. 
Evolusaun ne’e, rejista iha Brazil no mós iha nasaun seluk hanesan Angola no Mosambike, la akontese iha Timor Leste tanba domíniu indonéziu durante tinan 27, ne’ebé hamosu eradikasaun ba uzu portugués. 
Susana Afonso fiar katak jerasaun foun timoroan sira "urbanu no edukadu" iha lia portugés, deklara hanesan lia ofisiál hafoin independénsia, iha tinan 2002, ne’ebé "sei lidera mudansa". 
"Inovasaun tanki estável no frekuente", nia haklean.
Maibé, evolusaun Portugés iha Timor Leste mós sei kondisionada hosi nia popularidade relasaun ho lia ofisiál seluk nasaun nian, tetun, no idioma nasaun viziñu sira nian, Austrália no Indonézia. 
"Dezenvolvimentu portugés sei depende ba relasaun ho lia sira seluk no konkorénsia ho lia endójena sira seluk, inglés no indonéziu", nia esplika. 
Lingista ne’e ko’alia iha semináriu ne’ebé organiza hosi Centro Camões universidade Kings College de Londres hodi marka Loron Internasionál Lia no Kultura Portugeza. 

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Devolusaun dokumentu sira kona-ba espionajen ba Timor-Leste ne'e "hanesan pasu dahuluk"

Devolusaun Austrália hosi dokumentu hirak ne'ebé prende ilegal ba Timor-Leste no halo atividade espionajen iha Cambera kona-ba Tratado do Mar de Timor hanesan "pasu dahuluk ida", dehan horisehik ministru timoroan sira.

Foto: AC, ao SAPO Timor-Leste

"Ne'e progresu ida ba prosesu ne'e rasik. Maibé ne'e pasu dahuluk sei iha buat barak maka atu halo iha futuru", dehan ba Lusa Hernânio Coelho, ministru Negósiu Estranjeiru, kestiona katak karik desizaun Camberra ne'e loke dalan ba negosiasaun bilaterál ba fronteira marítima.

"Ita rekoñese katak prosesu ne'e la’ós simples no fásil atu rezolve. Importante maks ita hahú negosiasaun sira no iha perspetiva ba futuru hodi halibur ho ita-nia nasaun viziñu sira", nia afirma.

Iha loron-Domingu Governu timoroan fó sai ona katak Camberra aseita ona hodi fó fila fali dokumentu timoroan nian ne'ebé prende iha advogadu ida nia eskritóriu iha Camberra iha tinan 2013 no halo atividade espionajen australiana.

"Hafoin liu tiha fulan 16 hodi defende maka’as direitu ba prende no mentein dokumentu sira, Governu australianu ohin hato'o ona ba Tribunál Internasionál Justisa (TIJ), afirma katak hakarak fó fila fali dokumentu sira ne'e", informa gabinete porta-voz Governu nian, Agio Pereira.

Iha loron 22 Abril, Tribunál hatán ba karta australiana, autoriza devolusaun hosi dokumentu sira, ne’ebé sei taka metin hela, ho supervizaun hosi reprezentante Timor-Leste ida", nia esplika.

Kestiona kona-ba entrega dokumentu sira ne’e karik"hakmaan" sente la furak bainhira asaun australiana provoka, Hernânio Coelho hatete katak "ne'e realidade" ne'ebé prosesu ne'e hala’o.

"Maibé ita tenke hasoru prosesu ne'e ho matenek. Ida ne'e prosesu ne'ebé hala’o iha mekanizmu ho padraun internasionál sira respeita no kumpri", nia afirma.

Fronteira marítima, independénsia nunka kompletu bainhira laiha jurisdisaun iha ita-nia teritóriu delimitadu", nia hatete fila fali, esplika katak ne'e hotu sei iha "faze inisiál".

Lakohi atu halo komentáriu naruk - haruka asuntu ba porta-voz Governu nian-, Alfredo Pires, ministru Petróleu no Rekursu naturál, fó hanoin fila fali katak ne'e hahalok Austrália nian ne'ebé "Timor-Leste hanoin ne'e la apropriadu" maibé agora "haree hanesan  iha ona solusaun ida".

"Timor-Leste sempre nakloke ba kualkér tipu diálogu. Ita iha ideia sira ne'ebé fiksa ona maibé ita mós prontu hodi analiza senáriu oioin ne'ebé lori ba hetan solusaun ida. Parte rua tenke halibur hamutuk", nia afirma.

"Sei falta diálogu", nia hato'o.

Hanoin fila fali katak dokumentu ne'ebé pertense ba Timor-Leste hetan prende iha eskritóriu advogadu Bernard Colleary, iha Camberra, 03 dezembru 2013, hosi ekipa ajente ASIO (Organizasaun Australiana ba Servisu Sekretu) ida.

Komunikadu refere katak materiál sira fornese "detalla ba atividade espionajen hosi parte Austrália nian ho relasaun Timor-Leste, durante negosiasaun Tratadu kona-ba Determinadu Ajuste Marítimu iha Tasi Timor (DAMTT)" ne'ebé obriga Estadu timoroan aprezenta keixa ida kontra Austrália ba TIJ, iha Haia.

Iha keisa ne’e, Timor-Leste iha objetivu atu fó fila fali sira nia dokumentu, komunikadu fó hanoin fila fali. 

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste

Organizasaun timoroan alerta ba violénsia entre grupu rival hosi arte marsial sira

Organizasaun timoroan ida alerta ohin ba populasaun sira hosi zona balu iha sentru Díli atu konsiente ba risku sira ba konfrontu nebe bele mosu entre grupu rival rua hosi arte marsial, ne'ebé hahú iha findesemana liubá.

Iha alerta ba seguransa ne'ebé fó sai ohin hosi Fundasaun Mahein (FM) esplika katak durante findesemana verifika konfrontu sira entre elementu rua hosi grupu arte marsial iha Timor-Leste, grupu rua ne'e ilegal, PSHT no Kera Sakti.

"FM alerta posibilidade konfrontu foun sira entre grpu rival sira iha zona Farol, Aimutin no Bebonuk tanba PNTL seidauk kontrola situasaun", esplika iha komunikadu.

"Sidadaun timoroan tomak no estranjeiru sira tenki kuidadu ba violénsia sira nebe bele mosu iha zona sira ne'e, liuliu iha kalan no tenki foti medida hodi garanti seguransa rasik", refere iha komunikadu.

Fonte PNTL nian hatete ba Lusa katak autoridade sira akompaña hela situasaun ne'e no "no foti medida nebe presiza".

Tuir FM katak konfrontu foin lalais relasiona ho vídeo ida hosi Irlanda nebe hatudu konfrontu entre elementu sira hosi grupu rua entre hodi halo joven na'in ida hetan kanek todan.

"Konfrontu iha Dili mosu no hahú tanba vingansa hosi membru sira hosi joven ida ne'ebé kanek todan ne'e", esplika FM.

Hatene katak joven barak maka ba Irlanda hodi buka servisu iha tinan hirak ikus ne'e.

Iha fulan ikus ne'e Governu timoroan halo esforsu hodi kontrola atuasaun hosi membru grupu arte marsial sira, balun hosi ajente PNTL no Forsa FDTL.

Ne'e hanesan problema nebe mosu beibeik iha Timor-Leste no hahú tinan 2002 no 2003 maka organizasaun arte marsial sira envolve iha insidente hanesan, ho konflitu sira no rivalidade antigu sira.

Situasaun rezolve ona iha 2014 nia rohan, iha janeiru, primeiru-ministru Xanana Gusmão prezidi ona serimónia ida ne'ebé elementu polísia na'in 290 resin no F-FDTL partisipa iha grupu arte marsial halo renovasaun ba sira nia juramentu.

Harii iha Java Oriental, iha Indonézia iha tinan 1922, PSHT agora daudaun iha membru besik millaun ida iha Indonézia, iha mós elementu sira iha Malázia, Singapura, Holanda, Fransa no Portugal no nasaun sira seluk.

Iha Timor-Leste, PSHT tama iha tinan 1983, organizasaun iha "guru" na'in 3.500 resin, instrutor sira ne'ebé graduadu ona, ho membru besik rihun 30 iha Timor-Leste.

Kalkula mós katak Kera Sakti iha membru rihun resin.

Related Blog:

1. Article Timor Leste

2. Vaga Servisu Timor Leste

3. Noticias International

4. Financas Timor Leste