PD Prontu Apoiu Hanoin Xanana Ninian, Rui Araujo iha Anin Leten

Partidu Demokratiku nu’udar partidu ne’ebe hetan de’it kadeira walu durante elisaun Parlamentar 2012, nune’e partidu refere ladun iha kbi’it hodi halo negosiasaun politika ho partidu seluk hanesan CNRT ho FRETILIN.

Sa tan tuir surat ne’ebe Primeiru Ministru sesante no hanesan Prezidenti partidu CNRT haruka sai ba lideransa partidu koligasaun  iha loron 04/02/2015 dehan laiha lideransa ida maka di’ak iha partidu tolu iha koligasaun atu simu tongkat lideransa husi PM sesante Xanan  Gusmao.

Nune’e duni hafoin de enkontru ho Prezidenti da Republika sekretariu Jeral Partidu Demokratiku ne’e ho onestu hodi dehan sai pontus tolu ne’ebe tuir Partidu ninia hanoin presiza halo tan ba interese nasional.

“Ami hakarak afirma katak ami fo konfiansa total ba Prezidenti da Republika para atu forma Governu foun tuir Konstituisaun haruka I segundu ami hakarat afirma kata kami iha bloku, pronto simu saida de’it maka  bloku ninia hanoin no bloku ninia idea. Terseiru ami sempre apoiu total ba Maun Bo’ot Kay Rala Xanana Gusmao ninia hanoin, ninia idea ba mudansa ne’ebe akontese”, Hateten Mariano Assanami Sabino hafoin de enkontru ho Prezidenti da Republika iha Palasiu Prezidenti (09/02) lokraik.

Husu kona ba karik apoiu ne’ebe PD fo ba Primeiru Ministru sesante ninia hanoin no ideias, ne’e karik partidu PD mos apoiu no simu proposta husi prezidenti partidu CNRT, Kay Rala Xanana Gusmao hodi indizita DR. Rui Araujo atu assume pasta Primeiru Ministru iha VI Governu.

“Ami la tama ba ko’alia ba iha ne’eba (kandidatura Rui Araujo ba PM) mas ami so hanoin de’it saida maka Maun Bo’ot Kay Rala Xanana Gusmao hanoin”.

Antes ne’e mos Primeiru Ministru sesante haruka uluk ona envelope ba membru governu balun inklui mos Mariano Assanami Sabino no iha parte seluk membru Governu balun Primeiru Ministru V Governu konstitusional husu prepara aan tan ba iha posibilidade atu hetan kna’ar iha Governu foun oin mai.

“Tuir konstituisaun Primeiru Ministru eleitu maka forma ninia dentru do governu depois maka Prezidenti da Republika fo tomada de pose. Se de’it maka avansa I kuandu Maun Bo’ot hanoin, ami sempre asegura ida ne’e,” realsa Sekretariu Jeral PD, Mariano Assanami Sabino.

Mariano Assanami Sabino dehan ninia parte hato’o ona sira nia hanoin no opsaun ba Prezidenti da Republika hodi tetu no hola desizaun.